काठमाडौँ – बडीमालिका नगरपालिका-५ मनाका ६० वर्षीय डम्मबहादुर साउदको अरिङ्गालको टोकाइबाट गम्भीर घाइते भएपछि उपचारका क्रममा मृत्यु भएको छ। असोज २५ गते अरिङ्गालले टोकेर गम्भीर घाइते भएका साउदको भारतको मुम्बईस्थित नायर अस्पतालमा दश दिनपछि मृत्यु भएको हो, उनका आफन्त नरेन्द्र थापाले जानकारी दिएका छन्।
साउदलाई घर नजिकै पान्लोटे भन्ने स्थानमा रहेको भैँसी गोठको छेउमा अरिङ्गालले बनाएको घार भत्काउन खोज्दा अरिङ्गालले आक्रमण गरेको थियो। प्रारम्भिक उपचारका लागि जिल्ला अस्पताल बाजुरा हुँदै प्रादेशिक अस्पतालसम्म लगे पनि अवस्था जटिल भएपछि थप उपचारका लागि उनलाई भारत लगिएको थियो।
उक्त घटनामा सोही ठाउँका ६५ वर्षीय अङ्गे बडुवालको भने घटनास्थलमै मृत्यु भएको थियो।
- Jigyasa media
