वासिङ्टन डिसी – अमेरिकाको अलास्का राज्यमा बिहीबार भएको विमान दुर्घटनामा १० जनाको मृत्यु भएको छ। बेरिङ एयरको चार्टर्ड विमान उनालाक्लीट शहरबाट नोम जाँदै गर्दा दुर्घटनाग्रस्त भएको हो।
विमान बेपत्ता, भग्नावशेष ५४ किलोमिटर टाढा फेला
फ्लाइट ट्र्याकिङ वेबसाइट फ्लाइट राडारका अनुसार उडान भरेको ३९ मिनेटपछि विमान राडारबाट गायब भएको थियो। विमानको भग्नावशेष नोम विमानस्थलबाट करिब ५४ किलोमिटर दक्षिणपूर्वमा फेला परेको छ।
९ यात्रु र १ पाइलटको मृत्यु पुष्टि
नोम भोलेन्टियर अग्नि नियन्त्रण विभागका अनुसार विमानमा नौ जना यात्रु र एक पाइलट सवार थिए। अमेरिकी तटरक्षक बलले तीन जनाको शव पहिचान भइसकेको जनाएको छ, भने बाँकी सात जना अझै विमानभित्रै रहेको अनुमान गरिएको छ।
खराब मौसमले खोजी कार्यमा कठिनाइ
बिहीबार खराब मौसमका कारण खोजी कार्य प्रभावित भएको थियो। प्रारम्भिक खोजीमा कुनै अवशेष फेला नपरे पनि शुक्रबार विमान पत्ता लागेको छ। दुर्घटनाबारे विस्तृत अनुसन्धान जारी रहेको अधिकारीहरूले जनाएका छन्।
✈ धैर्य धारण गर्न मृतकका परिवारलाई अमेरिकी अधिकारीहरूको आग्रह।
- Jigyasa media
