बनेपा । शब्दयात्रा प्रकाशन, बनेपाले काभ्रेका तीन जना सक्रिय पत्रकारलाई सम्मान गर्दै आफ्नो वार्षिक कार्यक्रमलाई भव्य रूपमा सम्पन्न गरेको छ। शुक्रबार प्रकाशनको कार्यालयमा आयोजित विशेष कार्यक्रममा प्रल्हाद शर्मा हुमागाईं, केशवराज पौडेल, र कपिल कोइरालालाई सम्मान गरिएको हो।
हरिगोपाल प्रधानले व्यवस्थापन गरेको फोटोपत्रकारिता सम्मान पत्रकार केशवराज पौडेललाई प्रदान गरियो। विद्युतीय पत्रकारिता सम्मान कपिल कोइरालाले प्राप्त गरे भने छापा पत्रकारिता सम्मान प्रल्हाद शर्मा हुमागाईंलाई प्रदान गरियो। पौडेल गोरखापत्र, कोइराला हिमालय टेलिभिजन, र हुमागाईं प्रभातफेरि साप्ताहिकसँग आबद्ध हुनुहुन्छ।
कार्यक्रममा प्रमुख अतिथी नेपाल संस्कृत विश्वविद्यालयका पूर्वउपकुलपति कूलप्रसाद कोइराला, शब्दयात्रा प्रकाशनका अध्यक्ष हरि मञ्जुश्री, र हरिगोपाल प्रधानलगायतले सम्मानित पत्रकारहरूलाई कदरपत्र प्रदान गर्नुभयो।
स्रष्टा र विद्यार्थी सम्मान पनि प्रदान
कार्यक्रमका क्रममा तीनजना स्रष्टाहरू—अमृत अधिकारी, पुण्यवती घले, र रश्मी हुमागाईंलाई विद्वतवृत्ति सम्मान प्रदान गरियो। यसैगरी, काभ्रे बहुमुखी क्याम्पसमा पत्रकारिता अध्ययनरत अनिशा खत्रीलाई पत्रकारिता छात्रवृत्ति सम्मान र विकलाङ्ग छात्रवृत्ति रोशनी खत्रीलाई प्रदान गरियो।
पुस्तक विमोचन पनि सम्पन्न
कार्यक्रममा साहित्यकार हरि मञ्जुश्रीको योगदानमाथि केन्द्रित 'पाठकका आँखामा हरि मञ्जुश्री' पुस्तक र सुदीप अधिकारीद्वारा लिखित 'नेपालको विविध पृष्ठभूमि र योगदानमा षडानन्द' पुस्तक विमोचन गरियो।
प्रमुख अतिथी कूलप्रसाद कोइरालाले ज्ञानको खोज र अध्ययनको महत्वमाथि जोड दिँदै भन्नुभयो, "पेटको भोकले मान्छेलाई मूर्ख बनाउँछ, तर ज्ञानको भोकोले विद्वान बनाउँछ। गहिरो अनुसन्धान गर्नसके मात्र ज्ञानको सही निष्कर्षमा पुग्न सकिन्छ।"
सम्मानलाई निरन्तरता दिने योजना
शब्दयात्रा प्रकाशनका अध्यक्ष हरि मञ्जुश्रीले संस्थाले हरेक वर्ष २० विभिन्न सम्मान प्रदान गर्दै आएको र आगामी वर्षहरूमा पनि यो परम्परालाई निरन्तरता दिने प्रतिबद्धता व्यक्त गर्नुभयो।
कार्यक्रमको सफलताले काभ्रेको पत्रकारिता क्षेत्रलाई थप प्रोत्साहन गरेको संस्थाले जनाएको छ।
- Jigyasa media
