काठमाडौं । कवि तथा सञ्चारकर्मी छविरमण सिलवालको कविताकृति ‘डोरम्याट’ माथि गहन परिचर्चा सम्पन्न भएको छ । सुनकोसी वाङ्मय प्रतिष्ठानको आयोजनामा उत्पला क्याफे, बौद्धमा आयोजित कार्यक्रममा समकालीन नेपाली कविताको विविध पक्षमाथि चर्चा गरियो ।
परिचर्चाका क्रममा वरिष्ठ कवि कृष्ण बाउसेले ‘डोरम्याट’ लाई नेपाली जनताको बिम्बको रूपमा प्रस्तुत गरिएको उल्लेख गरे । उनले भने, "कृतिमा समेटिएका केही सुन्दर पर्यावरणीय दृष्टिचेत बोकेका कविताहरू प्रभावशाली छन् ।" उनले आगामी संस्करणमा आवरण अझै प्रतिकात्मक बनाउन सुझाव दिए ।
कवि तथा सम्पादक विमल भौकाजीले "डोरम्याट आयातित शब्द भए पनि नेपाली भाषा-साहित्यले यसलाई पूर्ण रूपमा आत्मसात गरिसकेको" बताए । उनले कृतिको सरल, सुललित भाषा र समसामयिक सन्दर्भप्रति ध्यान पुर्याइएको उल्लेख गरे ।
त्यस्तै, कवि आरएम डंगोलले "समकालीन नेपाली कविताको मूल प्रवाहमै लेखिएका काव्यहरू यस कृतिमा समेटिएको" बताए । उनले कविताको शिर्षक प्रतिकात्मक हुँदा अझ बलियो बन्ने धारणा राखे ।
कवि तथा साहित्यकार नवराज रिजालले पाठकीय टिप्पणी प्रस्तुत गर्दै "कविता जीवनसँग जोडिनुपर्दछ" भने । उनले "जनताको भावनामा शोषण गर्ने गलत प्रवृत्तिप्रति कविताले व्यङ्ग्य गरेको" बताए ।
कार्यक्रमका सभाध्यक्ष तथा कृतिकार छविरमण सिलवालले "समाजका विभिन्न घटनाक्रमले आफूलाई कविता लेख्न प्रेरित गरेको" बताए । उनले परिष्कृत र परिमार्जित रूपमा आफ्ना सिर्जनाहरू पाठकमाझ ल्याउने प्रतिबद्धता व्यक्त गरे ।
कार्यक्रममा कवि विष्णु थापा, विश्व सिग्देल, पूर्णबहादुर श्रेष्ठले ‘डोरम्याट’ का केही कविता वाचन गरेका थिए । साथै, होमशंकर बास्तोलाले स्वागत मन्तव्य राखेका थिए भने केशव पराजुली, बेदराज पौडेल लगायतले आ-आफ्नो धारणा व्यक्त गरे ।
कार्यक्रमको सञ्चालन प्रतिष्ठानका महासचिव साहित्यकार प्रदीप सापकोटाले गरेका थिए । मिडिया पार्टनर ‘इखवर नेट डटकम’ रहेको उक्त कार्यक्रम आफैं विरुद्धको आफैंको सहकार्यमा सम्पन्न भएको थियो ।
‘डोरम्याट’ भुँडीपुराण प्रकाशनद्वारा प्रकाशित कृति हो ।
- Jigyasa media
