हेटौंडा ।— मकवानपुरको पूर्वी क्षेत्रस्थित बकैया गाउँपालिकामा खोलाले बगाएर एक जनाको मृत्यु भएको छ। बकैया गाउँपालिका–५ पावसस्थित सिमात खोलाले बगाएर ६५ वर्षीय आशाकाजी दोङको आइतबार मृत्यु भएको जिल्ला प्रहरी कार्यालय मकवानपुरले जानकारी दिएको छ।
आशाकाजी दोङ बिहान १० बजे घरबाट बैंकमा पैसा झिक्न गरगरे बजारतर्फ जाँदै थिए। स्थानीय दूध संकलन केन्द्रले जम्मा गरिदिएको १३ हजार रुपैयाँ निकाल्न कृषि विकास बैंक गरगरे जाँदै गर्दा उनी खोलाले बगाएको इलाका प्रहरी कार्यालय फापरबारीका इञ्चार्ज प्रहरी निरीक्षक नारायण थापाले बताए।
खोलाले दोङलाई करिब ७ सय मिटर तलसम्म बगाएको थियो, जसकारण उनको मृत्यु भएको हो। घटना भएको खबर प्राप्त भएपछि स्थानीयहरू र प्रहरीले दोङको शव फेला पारेका थिए।
- Jigyasa media
