काठमाडौँ — अखिल नेपाल फुटबल संघ (एन्फा)ले बुधबार हुने नेपाल र बंगलादेशबीचको साफ महिला च्याम्पियनसिप फाइनल खेलको टिकट बिक्रीका लागि नयाँ व्यवस्था गरेको छ। यसअघि माउन्ट एभरेष्ट टिकट स्पोर्ट्स एण्ड इभेन्ट्स प्रालिले सेमिफाइनल खेलमा रंगशालाको क्षमता भन्दा बढी टिकट बिक्री गरेको भन्दै एन्फाले अनलाइन टिकट बिक्री बन्द गरेको थियो। १५ हजार दर्शक क्षमता भएको दशरथ रंगशालामा १८ हजारभन्दा बढीलाई प्रवेश दिइएपछि एन्फाले यो हस्तक्षेप गरेको हो।
अब फाइनल खेलको टिकट बुधबार बिहान ८ बजेबाट जावलाखेल खेल मैदान, एन्फा कम्प्लेक्स सातदोबाटो, र भद्रकालीस्थित आर्मी हेडक्वाटरको गेटबाट बिक्री गरिनेछ। एन्फाले अधिकतम १० हजार टिकट मात्रै बिक्री गरिने बताएको छ, जसमा भिआइपीतर्फको टिकट दर १ हजार र साधारणतर्फको टिकट दर ५ सय रुपैयाँ तोकिएको छ। एक व्यक्तिलाई भिआइपीतर्फ २ र साधारणतर्फ ५ टिकट मात्र किन्न अनुमति दिइएको छ।
यसपटक टिकट बिक्री केवल भौतिक स्थानबाट मात्र हुनेछ, अनलाइन खरिदहरू रद्द गरी ग्राहकलाई फिर्ता गर्ने घोषणा गरिएको छ। खेल साँझ ६:३० बजे दशरथ रंगशालामा हुनेछ, जसका लागि सुरक्षा व्यवस्थामा विशेष ध्यान दिइएको छ।
रंगशाला प्रवेशका क्रममा एन्फाले केही सामग्रीहरूमाथि प्रतिबन्ध लगाएको छ, जसमा हातहतियार, धुम्रपान सामग्री, मादक पदार्थ, ठूला झोला, हेल्मेट, बिना अनुमति झण्डा र ब्यानर, पानी बोतल, लेजर लाइट, लागू औषध, र छाता, नेल कटर, कैँची आदि सामग्रीहरू निषेध छन्।
- Jigyasa media
