जिज्ञाशा नेपाल | जेठ २०, २०८२
इन्डियन प्रिमियर लिग (आईपीएल) २०२५ को फाइनल आज साँझ हुँदैछ। उपाधिका लागि रोयल च्यालेन्जर्स बैंग्लोर (RCB) र पन्जाब किंग्स (PBKS) एकआपसमा भिड्ने भएका छन्। खेल गुजरातको अहमदाबादस्थित नरेन्द्र मोदी स्टेडियममा राति ७:४५ बजे सुरु हुनेछ।
यो सिजनले नयाँ विजेता जन्माउने निश्चित छ, किनभने आईपीएल इतिहासमा बैंग्लोर र पन्जाबमध्ये कुनै पनि टोलीले अहिलेसम्म उपाधि उचाल्न सकेका छैनन्।
बैंग्लोरले पहिलो क्वालिफायरमा पन्जाबलाई ८ विकेटले हराउँदै फाइनल यात्रा तय गरेको हो। उता दोस्रो क्वालिफायरमा पन्जाबले मुम्बई इन्डियन्सलाई ५ विकेटले पराजित गर्दै फाइनलमा स्थान बनाएको हो।
पन्जाब ११ वर्षपछि फाइनल पुगेको हो। यसअघि सन् २०१४ मा मात्र फाइनलमा पुगेको पन्जाब त्यो वर्ष उपविजेता बनेको थियो। अब उपाधि उचाल्ने लक्ष्यमा टोली उत्साहित देखिन्छ।
यता आरसीबीका लागि यो चौथो फाइनल हुनेछ। सन् २००९, २०११ र २०१६ मा उपाधिनजिक पुगेर चुकिएको टोलीले यसपटक पहिलोपटक ट्रफी जित्दै इतिहास रच्ने दाउमा छ।
फाइनल विजेताले २० करोड भारतीय रुपैयाँ पुरस्कार पाउनेछ भने उपविजेता टोलीले १३ करोड प्राप्त गर्नेछ। व्यक्तिगत प्रदर्शनमा पनि आकर्षक पुरस्कार छन् — ओरेन्ज क्याप र पर्पल क्याप विजेताले १०–१० लाख, उदियमान खेलाडीले २० लाख, र अन्य विधागत अवार्डजस्तै सुपर स्ट्राइकर, पावर प्लेयर, म्याक्सिमम सिक्सर, गेम चेन्जर आदिले पनि १० लाख रुपैयाँ जित्नेछन्।
-
Jigyasanepal
