काठमाडौं । काठमाडौँमा जारी साफ यू-२० च्याम्पियनसिप अन्तर्गत समूह 'ए' बाट नेपाल र बङ्गलादेश सेमिफाइनलमा पुगेका छन्। मंगलबार सम्पन्न समूह 'ए' को खेलमा बङ्गलादेशले श्रीलङ्कालाई २-० ले पराजित गरेसँगै नेपाल र बङ्गलादेशले सेमिफाइनल यात्रा सुनिश्चित गरेका हुन्। श्रीलङ्का भने समूह 'ए' का दुवै खेलमा पराजित भएसँगै प्रतियोगिताबाट बाहिरिएको छ।
आइतबारदेखि सुरु भएको प्रतियोगिताको पहिलो खेलमा नेपालले श्रीलङ्कालाई १-० गोल अन्तरले पराजित गर्दै विजयी सुरुवात गरेको थियो। सोमबार सम्पन्न समूह 'बी' को खेलमा भारतले भुटानलाई १-० गोलले हराएको थियो।
समूह 'ए' मा नेपालसँग पराजित भएको श्रीलङ्का सेमिफाइनल पुग्न यो खेल जित्नै पर्ने अवस्थामा थियो भने बङ्गलादेशले आफ्नो पहिलो खेल खेल्दै थियो।
यस प्रतियोगितामा नेपालसहित ६ देशले भाग लिएका छन्। नेपाल समूह 'ए' मा बङ्गलादेश र श्रीलङ्कासँग रहेको छ भने समूह 'बी' मा भारत, भुटान, र माल्दिभ्स रहेका छन्। नेपालले समूह चरणको अर्को खेल बिहीबार बङ्गलादेशसँग खेल्ने तालिका रहेको छ।
-
Jigyasanepal
