काठमाडौं - आइसिसी यु-१९ महिला टी-२० विश्वकपको एसिया छनोटमा नेपालले शानदार प्रदर्शन गर्दै बिहीबार कुवेतलाई १०८ रनको फराकिलो अन्तरले पराजित गरेको छ। नेपालले यो जितसँगै प्रतियोगितामा लगातार दोस्रो जित दर्ता गरेको हो।
कुवेतलाई १३ ओभरमै अलआउट गरेको नेपालका लागि बलिङमा रचना चौधरी र सिमाना केसीले उत्कृष्ट योगदान दिए, दुवैले २/२ विकेट लिए भने कप्तान पूजा महतो, कृष्मा गुरुङ र मनिशा उपाध्यायले समान १/१ विकेट हात पारे। कुवेतका लागि ओपनर जिफाले १२ रन बनाए पनि अन्य कुनै खेलाडीले दोहोरो अंकमा रन बनाउन सकेनन्।
नेपालले टस जितेर पहिले ब्याटिङ गर्ने निर्णय गर्दै २० ओभरमा ८ विकेट गुमाएर १३० रनको प्रतिस्पर्धात्मक स्कोर खडा गरेको थियो। कप्तान पूजा महतोले टोलीका लागि सर्वाधिक ३४ रन बनाइन् भने ओपनर साना प्रविनले २५ रन, ज्योत्सिका मरासिनीले २३ रन र एलिसाकुमारी यादवले १५ रनको योगदान दिए।
यसअघि, नेपालले आफ्नो पहिलो खेलमा थाइल्याण्डलाई ६७ रनले पराजित गर्दै विजयी शुरुवात गरेको थियो। एसिया छनोटमा नेपालसहित युएई, कुवेत र थाइल्याण्ड सहभागी छन्। प्रतियोगिताको शीर्ष स्थानमा रहने टोलीले अर्को वर्ष मलेसियामा आयोजना हुने विश्वकपमा स्थान पक्कागर्नेछ।
- Jigyasa media
