काठमाडौं । काठमाडौँ उपत्यकामा आज (बिहीबार) पनि वर्षाको सम्भावना रहेको छ। मौसम पूर्वानुमान महाशाखाका अनुसार उपत्यकामा दिउँसो वा राति हल्कादेखि मध्यमसम्म वर्षा हुन सक्ने देखिएको हो।
मौसमविद् सरोज पुडासैनीका अनुसार बिहानैदेखि उपत्यकाको अधिकांश आकाश बादलले ढाकिएको छ। देशका विभिन्न स्थानमा अहिले पनि वर्षा भइरहेको उनले जानकारी दिए।
यसैबीच काठमाडौँ उपत्यकाको न्यूनतम तापक्रममा गिरावट आएको छ। आज बिहान ५:४५ बजेको प्रारम्भिक मापनअनुसार न्यूनतम तापक्रम १५ डिग्री सेल्सियस रहेको छ, जुन हिजोको तुलनामा झन्डै २.५ डिग्रीले कम हो।
यद्यपि यो प्रारम्भिक मापन भएकाले वास्तविक न्यूनतम तापक्रम बिहान ८:४५ बजे सार्वजनिक गरिनेछ। सो समयमा तापक्रम अझ केही घट्न सक्ने वा यथावत् रहन सक्ने अनुमान गरिएको छ।
हिजो (बुधबार) काठमाडौँ उपत्यकाको न्यूनतम तापक्रम १७.४ डिग्री सेल्सियस मापन गरिएको थियो।
-
Jigyasanepal
