काठमाडौं, असार ९। नेपालमा यस वर्षको मनसुन विस्तार भए पनि अझै कमजोर अवस्थामा रहेकाले देशका अधिकांश क्षेत्रमा उल्लेख्य वर्षाको सम्भावना देखिएको छैन। मौसम पूर्वानुमान महाशाखाका अनुसार हाल मनसुनी वायु मुख्य रूपमा कोसी, मधेस र बागमती प्रदेशका सम्पूर्ण क्षेत्र, गण्डकीका केही भाग तथा लुम्बिनी प्रदेशको पूर्वी क्षेत्रमा सक्रिय छ भने अन्य क्षेत्रमा पश्चिमी तथा स्थानीय वायुको आंशिक प्रभाव रहेको छ।
असार ५ गते कोसी प्रदेशबाट नेपाल प्रवेश गरेको मनसुन असार ८ गते मात्र लुम्बिनी प्रदेशसम्म फैलिएको भए पनि यसको प्रभाव अझै कमजोर रहेको मौसमविद्हरूले बताएका छन्। त्यसैले देशभर व्यापक वर्षाको अवस्था तत्काल नदेखिएको जनाइएको छ।
⛈️ आज कहाँ-कहाँ पानी पर्ने सम्भावना?
मौसम महाशाखाको प्रक्षेपणअनुसार:
कोसी, बागमती, गण्डकी र लुम्बिनी प्रदेशका हिमाली तथा पहाडी भूभागका थोरै स्थानमा मेघगर्जन र चट्याङसहित मध्यम वर्षा हुन सक्छ।
कर्णाली र सुदूरपश्चिमका हिमाली तथा पहाडी क्षेत्रमा एक-दुई स्थानमा वर्षा वा हिमपातको सम्भावना छ।
कोसीका तराई क्षेत्र तथा मधेस, बागमती, गण्डकी र लुम्बिनीका तराईका केही स्थानमा मेघगर्जनसहित वर्षा हुन सक्ने अनुमान गरिएको छ।
यता लुम्बिनी र सुदूरपश्चिमका तराई क्षेत्र मा तातो लहर (Heat Wave) को जोखिम कायम रहेको छ भने बागमती र गण्डकीका तराई क्षेत्र मा तातो दिन रहने सम्भावना रहेको छ।
🌃 रातिको मौसम
रातिको समयमा पनि:
कोसी, बागमती र गण्डकी प्रदेशका पहाडी तथा हिमाली क्षेत्रका थोरै स्थानमा वर्षा हुन सक्छ।
मधेस प्रदेश र कोसी, बागमती तथा गण्डकीका तराईका एक-दुई स्थानमा मेघगर्जनसहित वर्षाको सम्भावना छ।
🌦️ काठमाडौंमा पानी पर्ला?
मौसमविद् डेभिड ढकाल का अनुसार काठमाडौं उपत्यकामा आज पानी पर्ने सम्भावना त रहेको छ, तर सम्भावना धेरै बलियो छैन।
उनका अनुसार:
"मध्याह्नपछि बादल विकास भएर वर्षा हुन सक्छ, तर मनसुन कमजोर भएकाले सम्भावना कम छ।"
हाल काठमाडौं उपत्यकामा वर्षा हुने सम्भावना करिब ४० प्रतिशत मात्र रहेको जनाइएको छ।
-
Jigyasanepal
