दाङ, जेठ १८ — दाङको तुलसीपुरमा सोमबार बिहान भएको दर्दनाक सडक दुर्घटनामा बाबुछोराको ज्यान गएको छ भने आमा गम्भीर घाइते भएकी छन्।
तुलसीपुर उपमहानगरपालिका अन्तर्गत गुल्म चोकमा बिहान करिब ६ बजे रा.१ ख २१९२ नम्बरको टिपरले विपरीत दिशाबाट आइरहेको रा.४ प ३३९० नम्बरको मोटरसाइकललाई ठक्कर दिँदा लमही नगरपालिका–५ निवासी ३५ वर्षीय मनोज नेपाली र उनका ५ वर्षीय छोरा मीनराज नेपाली गम्भीर घाइते भएका थिए।
घटनापछि तत्काल उद्धार गरी शिक्षण अस्पताल कोहलपुर लगिए पनि उपचारकै क्रममा बाबुछोराको मृत्यु भएको इलाका प्रहरी कार्यालय तुलसीपुरले जनाएको छ।
दुर्घटनामा मनोजकी श्रीमती ३४ वर्षीया अमृता नेपाली गम्भीर घाइते भएकी छन्। उनको शिक्षण अस्पताल कोहलपुरमै सघन उपचार भइरहेको छ।
प्रहरी नायब उपरीक्षक होमराज पराजुलीका अनुसार दुर्घटनामा संलग्न टिपर र चालकलाई नियन्त्रणमा लिइएको छ। घटनाबारे थप अनुसन्धान भइरहेको प्रहरीले जनाएको छ।
एकै परिवारमाथि आइपरेको यो दुर्घटनाले स्थानीय समुदायलाई स्तब्ध बनाएको छ। बाबुछोराको असामयिक निधनले परिवार शोकमा डुबेको छ भने घाइते आमाको स्वास्थ्य अवस्थाबारे चिन्ता व्यक्त गरिएको छ।
-
Jigyasanepal
