उदयपुर, वैशाख ७ —
उदयपुरमा छिमेकीबीचको सामान्य विवाद घातक बनेको छ। ७३ वर्षीय एक वृद्धले आवेगमा धारिलो हतियार प्रहार गर्दा छिमेकीको ज्यान गएको प्रहरीले जनाएको छ।
घटना चौदण्डीगढी नगरपालिका–७ सितापाइला टोल मा सोमबार राति करिब सवा ८ बजेतिर भएको हो। सोही स्थानका रामप्रसाद राई (७३) ले छिमेकी माहाशेर राई (६४) माथि आक्रमण गरेका थिए।
⚠️ छातीमा गहिरो चोट, बाटोमै मृत्यु
धारिलो हतियार प्रहारबाट माहाशेर राईको छातीको दायाँ माथिल्लो भागमा गहिरो चोट लागेको थियो। गम्भीर अवस्थामा उनलाई नगर अस्पताल बेल्टार लगिँदै गर्दा बाटोमै ज्यान गएको प्रहरीले जनाएको छ। अस्पताल पुग्नेबित्तिकै चिकित्सकले मृत्यु पुष्टि गरेका थिए।
🚓 आरोपी तत्काल पक्राउ
घटनापछि प्रहरीले तत्कालै रामप्रसाद राईलाई नियन्त्रणमा लिएको छ। इलाका प्रहरी कार्यालय बेल्टार बाट प्रहरी निरीक्षक प्रभात लक्सम लिम्बूको नेतृत्वमा गएको टोलीले उनलाई पक्राउ गरेको हो।
हाल उनलाई हिरासतमा राखी घटनाबारे थप अनुसन्धान भइरहेको प्रहरीले जनाएको छ।
-
Jigyasanepal
