काठमाडौं, जेठ २६ — देशका विभिन्न स्थानमा बाढी, पहिरो तथा सडक मर्मत कार्यका कारण प्रमुख सडक सञ्जाल प्रभावित बनेका छन्। काठमाडौँको सतुंगल–चित्लाङ सडकसहित तीन सडकखण्ड मंगलबार पनि पूर्ण रूपमा अवरुद्ध रहेका छन् भने भोजपुरस्थित मध्यपहाडी लोकमार्गमा एकतर्फी सवारी सञ्चालन भइरहेको छ।
काठमाडौँको चन्द्रागिरि नगरपालिका–९ देउराली क्षेत्रमा सडक मर्मत कार्य जारी रहेकाले सतुंगल–चित्लाङ सडक पूर्ण रूपमा बन्द गरिएको छ। सम्बन्धित निकायका अनुसार उक्त सडक करिब एक महिनासम्म बन्द रहने भएकाले यात्रु तथा सवारी चालकलाई वैकल्पिक मार्ग प्रयोग गर्न आग्रह गरिएको छ।
यस्तै, बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्ड सम्भावित बाढीको उच्च जोखिमका कारण बन्द गरिएको छ। वर्षासँगै नदीमा पानीको बहाव बढ्न सक्ने भएकाले सुरक्षाका दृष्टिले सवारी आवागमन रोकिएको जनाइएको छ।
उता पाँचथरको याङवरक गाउँपालिका क्षेत्रमा बाढी र पहिरोको जोखिम बढेपछि मध्यपहाडी राजमार्ग अन्तर्गत तीन स्थानमा सडक पूर्ण रूपमा अवरुद्ध भएको छ। अवरुद्ध सडक खुलाउने प्रयास जारी रहे पनि मौसम प्रतिकूल रहेकाले काममा कठिनाइ भइरहेको छ।
यसैबीच, भोजपुरस्थित मध्यपहाडी लोकमार्ग मा सडक क्षति र जोखिमका कारण एकतर्फी मात्र सवारी सञ्चालन भइरहेको छ। प्रहरीले अत्यावश्यक अवस्थामा मात्रै यात्रा गर्न र यात्रा अघि सडक अवस्थाबारे जानकारी लिन सर्वसाधारणलाई आग्रह गरेको छ।
मनसुन सक्रिय भएसँगै देशका पहाडी तथा हिमाली जिल्लामा बाढी–पहिरोको जोखिम बढेकाले सतर्कता अपनाउन सम्बन्धित निकायले अनुरोध गरेका छन्। यात्रु तथा सवारी चालकलाई मौसम र सडक अवस्थाबारे नियमित जानकारी लिएर मात्र यात्रा गर्न सुझाव दिइएको छ।
-
Jigyasanepal
