काठमाडौं — देशभर बदली मौसमको प्रभाव कायमै रहँदा आइतबार राति पनि देशका सातै प्रदेशमा वर्षा, हिमपात र हुरीको सम्भावना रहेको मौसमविद्हरुको चेतावनी आएको छ।

जल तथा मौसम पूर्वानुमान महाशाखाका अनुसार पश्चिमी वायु प्रणालीसँगै बंगालको खाडीबाट आइरहेको जलवाष्पयुक्त हावाको कारण मौसम अस्थिर बन्दै गएको हो। त्यसकै प्रभावस्वरूप राति पनि केही प्रदेशमा भारी वर्षासमेतको सम्भावना रहेको महाशाखाले जनाएको छ।

सातै प्रदेशको सम्भावित अवस्था यस्ता छन्:

कोसी प्रदेश: हिमाली क्षेत्रमा हल्का हिमपातको सम्भावना, पहाडी र तराईका केही स्थानमा मेघगर्जन र चट्याङसहित मध्यम वर्षा हुने प्रक्षेपण।

मधेस प्रदेश: केही स्थानमा चट्याङसहितको हल्कादेखि मध्यम वर्षाको सम्भावना।

बागमती प्रदेश: हिमाली क्षेत्रमा हिमपात, पहाडी र तराईका थोरै स्थानमा मेघगर्जन, चट्याङसहित हल्का वर्षा सम्भावित।

गण्डकी प्रदेश: पहाडी तथा तराई क्षेत्रका केही स्थानमा मध्यमदेखि भारी वर्षा, हिमाली क्षेत्रमा हल्का हिमपातको सम्भावना।

लुम्बिनी प्रदेश: विभिन्न भूभागमा हुरी, चट्याङसहितको भारी वर्षा र हिमपात सम्भावित। सावधानी अपनाउन महाशाखाको सुझाव।

कर्णाली प्रदेश: थोरै स्थानमा हुरी र चट्याङसहित हल्कादेखि मध्यम वर्षा, हिमाली क्षेत्रमा हल्का हिमपात।

सुदूरपश्चिम प्रदेश: हिमाली क्षेत्रमा हिमपात, पहाडी तथा तराईमा चट्याङ र हुरीसहित हल्कादेखि मध्यम वर्षाको चेतावनी।

महाशाखाले सम्भावित जोखिमलाई मध्यनजर गर्दै आवश्यक सतर्कता अपनाउन आह्वान गरेको छ। घरबाहिर निस्कँदा छाता तथा रेनकोटको प्रयोग, बिजुली गडगडाहट भइरहँदा खुला स्थानमा नबस्न तथा खेतबारी र गोठालोमा खटिनेहरूले विशेष सतर्कता अपनाउन विज्ञहरूको सल्लाह छ।

• Jigyasanepal