काठमाडौँ, माघ २८, २०८२ — क्यानडाको ब्रिटिस कोलम्बिया प्रान्तस्थित टम्बलर रिज सहरको एक हाई स्कुलमा बुधबार बिहानै भएको अन्धाधुन्ध गोली प्रहारमा कम्तीमा १० जनाको मृत्यु भएको छ भने २५ जना घाइते भएका छन्। अन्तर्राष्ट्रिय सञ्चारमाध्यमहरूले घटनालाई अत्यन्तै गम्भीर र स्तब्ध पार्ने आक्रमणका रूपमा वर्णन गरेका छन्।

घटना टम्बलर रिज माध्यमिक विद्यालयमा भएको हो, जहाँ कक्षा ७ देखि १२ सम्मका करिब १७५ विद्यार्थी अध्ययनरत छन्। मृतकमा विद्यार्थी परेका छन् वा छैनन् भन्ने विषयमा यकिन जानकारी सार्वजनिक भइसकेको छैन।

प्रहरीका अनुसार स्थानीय समयअनुसार राति १:२० बजे स्कुलभित्र गोली प्रहार भएको सूचना प्राप्त भएको थियो। त्यसपछि ठूलो संख्यामा प्रहरी र एम्बुलेन्स टोली घटनास्थलमा खटाइएको थियो। स्कुल परिसरमा प्रवेश गर्दा धेरै व्यक्ति घाइते र मृत अवस्थामा भेटिएका थिए।

रोयल क्यानेडियन माउन्टेड पुलिस (आरसीएमपी) का उत्तरी जिल्ला कमान्डर केन फ्लोयडले अवस्था गम्भीर रहेको बताएका छन्। उनले स्कुल प्रशासन, आपत्कालीन सेवा टोली तथा स्थानीय बासिन्दाले उद्धार र व्यवस्थापनमा सहयोग गरेको जानकारी दिए।

आक्रमणकारी ठानिएका एक व्यक्ति पनि घटनास्थलमै मृत फेला परेको प्रहरीले जनाएको छ। घटनापछि स्कुल बन्द गरिएको छ र बाँकी सबै विद्यार्थी तथा कर्मचारीलाई सुरक्षित रूपमा बाहिर निकालिएको पुष्टि गरिएको छ। प्रभावित क्षेत्रमा सुरक्षा व्यवस्था कडा पारिएको छ भने घटनाको विस्तृत अनुसन्धान जारी रहेको छ।

स्थानीय विधायक ल्यारी न्युफेल्डले सर्वसाधारणलाई शान्त रहन र अनावश्यक रूपमा बाहिर ननिस्कन आग्रह गरेका छन्। उनले आफ्ना प्रियजनको खोजीमा बाहिरिएका नागरिकलाई घर फर्कन र सुरक्षामा ध्यान दिन अपिल गरेका छन्।

यो घटना क्यानडामा पछिल्लो समय भएको सबैभन्दा भयावह स्कुल आक्रमणमध्ये एकका रूपमा लिइएको छ। शान्तिपूर्ण समाजमा यस्ता हिंसात्मक घटना दोहोरिन नदिन कडा सुरक्षा नीति र मानसिक स्वास्थ्यसम्बन्धी सचेतना अझ सशक्त बनाउनु पर्ने आवाज पुनः उठ्न थालेको छ।

• Jigyasanepal