सल्यान – सल्यानमा मिनी ट्रक दुर्घटना हुँदा ३ जनाको मृत्यु भएको छ भने ८ जना घाइते भएका छन्। कपुरकोट गाउँपालिका–६ सिनबाङ्गको दुबेदेबाट धान र पराल बोकेर जाँदै गरेको मिनी ट्रक सोमबार बेलुकी सडकबाट करिब १५० मिटर तल खस्दा यो दुर्घटना भएको हो।
दुर्घटनामा मृत्यु हुनेहरूमा १४ वर्षीय गोबर्द्धन खडका, १२ वर्षीय डिल्ली भनिने अनिल भण्डारी, र १५ वर्षीया सिर्जना बस्नेत रहेका छन्। कपुरकोट गाउँपालिकाका अध्यक्ष दुर्गा पुनका अनुसार दुई जनाको घटनास्थलमै र एक जनाको बाटोमै मृत्यु भएको हो।
घाइते हुनेहरूमा १३ वर्षीया खुमा बस्नेत, ३५ वर्षीया नन्दा बस्नेत, १७ वर्षीय जीत सागर बस्नेत, २२ वर्षीय हिक्मत थापा, र गाडी चालक २४ वर्षीय मानबहादुर भण्डारीलगायत रहेका छन्। सबै घाइतेलाई कपुरकोट गाउँपालिकाको अस्पतालमा प्राथमिक उपचार गराइएको छ, जसमा केहीको अवस्था गम्भीर रहेकाले थप उपचारका लागि रिफर गर्ने तयारी गरिएको छ।
जिल्ला प्रहरी कार्यालय सल्यानका सूचना अधिकारी प्रहरी निरीक्षक रेसम बहादुर खत्रीले साँघुरो सडकका कारण दुर्घटना भएको हुन सक्ने अनुमान गरिएको छ भने दुर्घटनाको विस्तृत कारण अझै खुलिनसकेको बताए।
- Jigyasa media
