गोरखा - उत्तरी गोरखाको धार्चे गाउँपालिका–५, सिङ्लास्थित रेसेमा पहिरोमा परेर आइतवारदेखि बेपत्ता भएका चार जनाको शव आज फेला परेको छ।

जिल्ला प्रहरी कार्यालयका सूचना अधिकारी एवं प्रहरी नायव उपरीक्षक रमेशकुमार श्रेष्ठका अनुसार, पहिरोमा परेर बेपत्ता भएका ७० वर्षीय सुलाल कान्छा गुरुङको शव घर नजिकै २० मिटर तल पुरिएको अवस्थामा फेला परेको छ। यस्तै, ७० वर्षीय जीतबहादुर गुरुङको शव पनि फेला परेको छ, जुन घरदेखि करिब २५ मिटर तल पहिरोले पुरिएको अवस्थामा थियो। 

पहिरोमा परेर बेपत्ता भएका रेशम गुरुङको शव भने आज दिउँसो करिब ३ बजे फेला परेको हो। उनको शव घरदेखि ३० मिटर तल फेला परेको श्रेष्ठले बताए। 

बेपत्ता भएकी कान्छी गुरुङको शव गण्डकी गाउँपालिका–८ बर्खेघाटमा फेला परेको छ। आइतबार दिउँसो बेवारिसे अवस्थामा बुढीगण्डकी नदी किनारमा भेटिएको उक्त शव पहिरोमा परेर बेपत्ता भएकी कान्छी गुरुङको भएको परिवारले पुष्टि गरेको हो।

पहिरोमा बेपत्ता भएका आरुघाट गाउँपालिका २७ वर्षीय रमेश परियारको अवस्था अझै अज्ञात छ। उनको खोजी भइरहेको प्रहरीले जनाएको छ। – रासस

• RSS