सर्लाही – अज्ञात समूहको गोली प्रहारबाट सर्लाहीमा एक विद्यालयका प्रधानाध्यापक गम्भीर घाइते भएका छन्। सर्लाही र सिन्धुलीको सीमावर्ती क्षेत्र हरिहरपुरगढी गाउँपालिका–६ स्थित बागमती नदी किनारमा भएको घटनामा मकवानपुरको बागमती गाउँपालिका–१, बोटगाउँका प्रेमबहादुर बोम्जनलाई अज्ञात आक्रमणकारीले गोली प्रहार गरेका हुन्।
प्रहरीका अनुसार, बोम्जनको गालामा गोली लागेर उनी गम्भीर घाइते भएका छन्। घटनाको खबर पाएपछि इलाका प्रहरी कार्यालय कर्मैयाबाट प्रहरी सहायक निरीक्षक कलमबहादुर शाहीको टोली तुरुन्तै घटनास्थल पुगेको थियो। प्रारम्भिक उपचारपछि बोम्जनलाई थप उपचारका लागि बारा पठाइएको प्रहरीले जनाएको छ।
घटनाको समयमा, बोम्जन रौतहटको गैयाटारस्थित आफन्तको घरबाट मोटरसाइकलमा फर्किरहेका थिए। उनी मकवानपुरको बकैया गाउँपालिका–१ स्थित बुद्ध माध्यमिक विद्यालय हात्तीसुँडेका प्रधानाध्यापक हुन्। घटनाको पछाडि रहेको उद्देश्य र जिम्मेवार समूहको पहिचान गर्न प्रहरी अनुसन्धान जारी रहेको जिल्ला प्रहरी कार्यालयले जनाएको छ।
- Jigyasa media
