जिज्ञासा नेपाल काठमाडौं – बालिकालाई बेचबिखन गरेको आरोपमा एक युवक पक्राउ परेका छन्। नेपाल प्रहरीको मानव बेचबिखन अनुसन्धान ब्यूरोको टोलीले काभ्रेको चौरीदेउराली गाउँपालिका–१ का २० वर्षीय कुशल खरेललाई पक्राउ गरेको हो।

खरेल भक्तपुरको मध्यपुर थिमी नगरपालिका–१ मा रहेको सिन्धुली होटल ढिडो सर्भिस एण्ड गेस्टहाउसका सञ्चालकमध्ये एक रहेको पाइएको ब्यूरोका एसपी तथा प्रवक्ता गौतम मिश्रले जानकारी दिए। 

प्रहरीका अनुसार, कुशल खरेल नेपाली काउन्टडाउन युट्युब च्यानलका सञ्चालक पनि रहेका छन्। नाबालिकालाई होटलमा वेटरको काम भनेर जबर्जस्ती यौनकार्यमा लगाउने गरेको पाइएको छ।

यसअघि, उक्त होटलबाट २४ असारमा ब्यूरोको टोलीले बीरबहादुर सिन्तान र सुबिलाल सिन्तानलाई पक्राउ गरेको थियो। तर, खरेल भने फरार थिए। उनलाई मंगलबार बत्तिसपुतलीबाट पक्राउ गरी थप अनुसन्धान तथा कारबाहीका लागि जिल्ला प्रहरी परिसर भक्तपुर पठाइएको छ।

उनीहरूले सञ्चालन गरेको गेस्टहाउसबाट ६ जना बालिकाको उद्दार पनि गरिएको थियो। 

 स्रोत:नेपाल प्रहरी, मानव बेचबिखन अनुसन्धान ब्यूरो

• Jigyasa media