उदयपुर – मदन भण्डारी राजमार्गअन्तर्गत त्रियुगा नगरपालिका–७, जोगीदहमा जन्ती बोकेको बस र मिनी ट्रक आपसमा ठोक्किँदा एक जनाको मृत्यु भएको छ भने २६ जना घाइते भएका छन्।
जिल्ला प्रहरी कार्यालय उदयपुरका अनुसार बाराबाट जन्ती लिएर उदयपुर जाँदै गरेको बाग्मती प्रदेश ०६–००१ ख ०१९५ नम्बरको बस र विपरीत दिशाबाट तेजपत्ता बोकेर कटारी जाँदै गरेको ना. ८ख २४०४ नम्बरको मिनी ट्रक एकआपसमा ठोक्किएको थियो।
दुर्घटनामा बाराको गढी गाउँपालिका–४ निवासी ७० वर्षीय सीताराम धामीको ज्यान गएको छ। गम्भीर घाइते भएका धामीलाई उपचारका लागि न्युरो अस्पताल, विराटनगर लगिएको थियो, जहाँ उपचारका क्रममा उनको मृत्यु भएको प्रहरी निरीक्षक सन्तोष कार्कीले जानकारी दिए।
घटनामा घाइते भएका २६ मध्ये २० जनालाई सामान्य उपचारपछि अस्पतालबाट डिस्चार्ज गरिएको छ। दुई जनाको जिल्ला अस्पताल उदयपुरमा उपचार भइरहेको छ भने तीन गम्भीर घाइते न्युरो अस्पताल, विराटनगरमा उपचाररत छन्।
- Jigyasa media
