सल्यान, असोज १२ । राप्ती राजमार्गअन्तर्गत सल्यानको कपुरकोट गाउँपालिका–३, चोरखोलामा आइतबार बिहान भएको गाडी दुर्घटनामा एकै परिवारका तीन जनाले ज्यान गुमाएका छन्।
प्रहरीका अनुसार बिहान करिब ४ बजे लु २ ख ६५०२ नम्बरको फोर्स गाडी सडकबाट करिब ४०० मिटर तल खस्दा रुकुम पश्चिम, बाँफीकोट गाउँपालिका–५ का ६८ वर्षीया पबी केसी, उनका देवरका छोराहरू २५ वर्षीय प्रकाश केसी र २७ वर्षीय शशीधर केसीको घटनास्थलमै मृत्यु भएको हो।
यसै दुर्घटनामा पबीकै छोरा ४७ वर्षीय खगेन्द्र केसी र ३६ वर्षीया छोरी बिना केसी गम्भीर घाइते भएका छन्। उनीहरूलाई प्रारम्भिक उपचारपछि बाँकेको नेपालगन्जस्थित अस्पतालमा थप उपचारका लागि रेफर गरिएको प्रहरीले जनाएको छ।
वडाध्यक्ष मनु शाहीका अनुसार मृतक पबी केसी पेटको रोगबाट पीडित थिइन्। उपचारका लागि नेपालगन्ज लैजाने क्रममा गाडी दुर्घटनामा परेको हो। उनका अनुसार, “दसैँको मुखमै एकै परिवारमा यस्तो पीडादायी घटना घट्नु अत्यन्त दु:खद छ।”
शाहीले पबीलाई पहिलादेखि नै पेटको समस्या रहेको र विभिन्न ठाउँमा उपचार गराइरहेकाले चौरजहारी अस्पतालमा जाँच गराएपछि नेपालगन्ज रेफर गरिएको बताए। दुर्घटनाग्रस्त गाडी पनि केसी परिवारकै भएको जनाइएको छ।
सडक दुर्घटनामा एकै परिवारका तीन सदस्यको मृत्यु र दुई घाइते भएपछि गाउँ नै शोकमा डुबेको छ। दसैँको उत्सव मनाउनुपर्ने बेला विपत्तिको चपेटामा परेका केसी परिवारको पीडाले स्थानीय समुदायलाई पनि स्तब्ध बनाएको छ।
-
Jigyasanepal
