काठमाण्डौ ।
काठमाडौँ उपत्यकामा जाडो दिनप्रतिदिन कडा हुँदै गएको छ। देशभर तापक्रम लगातार घटिरहेको बेला राजधानीको न्यूनतम तापक्रम पनि झन्डै ९ डिग्री सेल्सियससम्म तल झरेको छ, जसले चिसोको प्रभाव झनै तीव्र भएको संकेत गर्छ।
आइतबार बिहान ५:४५ को मापन अनुसार काठमाडौँको न्यूनतम तापक्रम ९.३ डिग्री सेल्सियस नापिएको मौसम पूर्वानुमान महाशाखाका मौसमविद् डेभिड ढकालले जानकारी दिए।
उनका अनुसार शनिबार बिहान सोही समयमा तापक्रम ९.६ डिग्री थियो, तर ८:४५ सम्म झर्दै ९.२ डिग्री पुगेको थियो।
“आज त ६:४५ मै ९.३ देखिएको छ, ८:४५ सम्म यसभन्दा तल झर्ने सम्भावना पक्कै छ,” ढकालले भने।
नेपालमा आधिकारिक न्यूनतम तापक्रम हरेक दिन बिहान ८:४५ बजेपछि घोषणा गरिन्छ।
मौसमविद्हरूका अनुसार राति आकाश सफा हुँदा तापक्रम अझै घट्ने, र बादल लाग्दा केही कम घट्ने प्रवृत्ति हुन्छ। अहिले उपत्यकामा राति आकाश खुलेर तापक्रम झन् तल झर्ने क्रम जारी छ।
देशका अन्य भूभागमा पनि यस्तै चिसोको प्रभाव बढ्दै गएको छ। बिहान-साँझ कडाको चिसो अनुभूत हुन थालेपछि स्वास्थ्य सतर्कता अपनाउन चिकित्सकहरूले सुझाव दिएका छन्।
सामान्यतया नोभेम्बरसँगै सुरु हुने उपत्यकाको जाडो यस वर्ष केही चाँडै बढ्दै गएको जनाइएको छ।
-
Jigyasanepal
