काठमाडौँ । नेपालमा हाल कुनै उल्लेखनीय मौसम प्रणालीको प्रभाव नरहेको जल तथा मौसम पूर्वानुमान महाशाखाले जनाएको छ। महाशाखाका अनुसार देशभरको मौसम सामान्य स्थिर अवस्थामा रहँदा अधिकांश स्थानमा आकाश सफा देखिएको छ।
कोशी, बागमती, गण्डकी र कर्णाली प्रदेशका पहाडी तथा हिमाली भूभागमा भने अहिले आंशिक बदली देखिएको छ भने तराई र अन्य क्षेत्रहरूमा मौसम मुख्यतया खुला र शान्त छ।
आज दिउँसोको मौसम पूर्वानुमान अनुसार कोशी र गण्डकी प्रदेशका केही पहाडी क्षेत्रमा आंशिक बदली रहिरहने र बाँकी सबै भूभागमा खुला मौसम रहने सम्भावना रहेको बताइएको छ।
त्यस्तै, राति गण्डकी प्रदेशका पहाडी भागमा हल्का बदली रहन सक्ने भए पनि देशका अन्य भागमा आकाश सफा रहने महाशाखाको अनुमान छ।
मौसमविद्हरूका अनुसार हाल कुनै सक्रिय वर्षा प्रणाली नभएकाले तत्काल वर्षा वा हिउँ पर्ने सम्भावना छैन। उनीहरूले किसान र यात्रुहरूलाई हावापानी सामान्य स्थिर रहेकोले दैनन्दिन कामकाजमा सहजता रहने बताएका छन्।
महाशाखाले आगामी केही दिनसम्म पनि देशभरको मौसम स्थिर रहने र हिमाली क्षेत्रबाहेक अन्य भागमा उल्लेखनीय परिवर्तन नदेखिने जनाएको छ।
-
Jigyasanepal
