१० पुस, काठमाडौं । काठमाडौं विश्वविद्यालय (केयू) र धुलिखेल अस्पतालबीचको विवाद समाधान गर्न गठन गरिएको समितिमा धुलिखेल अस्पताल पक्षले सहभागी हुन अस्वीकार गरेको छ।

प्रधानमन्त्री तथा विश्वविद्यालयका कुलपति केपी शर्मा ओलीको अध्यक्षतामा पुस ८ गते बसेको विश्वविद्यालयको सिनेट बैठकले सात सदस्यीय समिति गठन गरेको थियो। राष्ट्रिय योजना आयोगकी शिक्षा हेर्ने सदस्य गीता पौडेल अधिकारीको संयोजकत्वमा गठित उक्त समितिमा केयूका उपकुलपति प्रा. डा. भोला थापा, कानुन संकायका डीन प्रा. डा. ऋषिकेश वाग्ले, र मेडिकल संकायका डीन प्रा. डा. मनोज हुमागाईंलाई सदस्यको रूपमा समावेश गरिएको थियो।

धुलिखेल अस्पतालका तर्फबाट पूर्वउपकुलपति प्रा. डा. रामकृष्ण मकाजु, डा. विराज कर्माचार्य र डा. राजीव श्रेष्ठलाई सदस्यका रूपमा तोकिएको थियो। तर, अस्पतालका तर्फबाट तोकिएका सदस्यहरूले समितिमा बस्न अस्वीकार गरेका छन्।

सूत्रका अनुसार विश्वविद्यालयले पठाएको पत्र अस्पतालमा दर्ता गराउन खोज्दा पनि अस्वीकार गरिएको छ। अस्पतालका कार्यकारी निर्देशक एवं पूर्वउपकुलपति प्रा. डा. रामकृष्ण मकाजुले वर्तमान उपकुलपतिको नेतृत्वमा आफू समितिमा सहभागी नहुने बताउँदै समितिको नेतृत्व मन्त्रीस्तरीय व्यक्तिले गर्नुपर्ने अडान राखेका छन्।

यो असहमतिले विवाद समाधान प्रक्रिया थप जटिल बनेको छ भने काठमाडौं विश्वविद्यालय र धुलिखेल अस्पतालबीचको मतभेद अझै गहिरिएको छ।

• Jigyasa media