काभ्रे, असोज ७।
नमोबुद्ध नगरपालिका–२, बिस किलोस्थित बीपी राजमार्गमा भएको सवारी दुर्घटनामा गम्भीर घाइते भएका नमोबुद्ध नगरपालिकाका पूर्व मेयर टिपी शर्मा तिमल्सिनाको निधन भएको छ। धुलिखेल अस्पतालमा करिब दुई महिना (५७ दिन ) उपचारपछि मंगलबार बिहान उनको मृत्यु भएको पारिवारिक श्रोतले जनाएको हो।
२०७४ सालमा नेकपा एमालेबाट निर्वाचित भएर मेयर बनेका शर्मा करिब ५७ दिनदेखि कोमामा उपचाररत थिए।
दुर्घटनाको विवरण
मिति २०८२ साउन १० गते बिहान ७:४४ बजे नार्केबाट काठमाडौंतर्फ जाँदै गरेको बा ६२ प ३५७८ नम्बरको स्कुटरले विपरीत दिशाबाट आउँदै गरेको बा.प्र. ०३–०२–००७ प ८८०० नम्बरको स्कुटरलाई ठक्कर दिँदा दुर्घटना भएको थियो।
सो दुर्घटनामा बा.प्र. ०३–०२–००७ प ८८०० नम्बर स्कुटर चालक छोरा किशोर तिमल्सिना सामान्य घाइते भएका थिए भने पछाडि सवार उनका पिता, ७२ वर्षीय टंकप्रसाद शर्मा (पूर्व मेयर टिपी शर्मा तिमल्सिना) गम्भीर घाइते भएका थिए। उनलाई तत्कालै धुलिखेल अस्पतालमा पठाइएको थियो।
त्यस्तै, ठक्कर दिने बा ६२ प ३५७८ नम्बरको स्कुटर चालक, दोलखा मेलुङ–३ घर भई हाल रोशी गाउँपालिका–८ बस्ने २६ वर्षीय निमा तेम्वा थोकर पनि सामान्य घाइते भएका थिए र उनलाई मेथिनकोट अस्पतालमा उपचार गरिएको थियो।
प्रहरीले दुर्घटनामा संलग्न चालक र दुवै स्कुटर नियन्त्रणमा लिएको जनाएको छ।
पूर्व मेयरको निधनसँगै नमोबुद्ध क्षेत्र शोकमग्न बनेको छ। स्थानीयवासीले शान्त स्वभावका, समाज सेवामा अग्रसर नेताको असामयिक निधनले ठूलो क्षति भएको बताएका छन्।
-
Jigyasanepal
