तनहुँ । तनहुँको बन्दीपुर गाउँपालिका–५ बाहुनभञ्ज्याङमा मादक पदार्थ सेवनपछि भएको कुटपिट घटनामा एक जनाको ज्यान गएको छ।
जिल्ला प्रहरी कार्यालय तनहुँका अनुसार ७० वर्षीय खिमबहादुर गुरुङले मादक पदार्थ सेवन गरेको अवस्थामा छिमेकी ५८ वर्षीय खुसीमान गुरुङमाथि चिर्पट प्रहार गर्दा गम्भीर घाइते भएका थिए।
घाइते खुसीमानलाई उपचारका लागि अस्पताल लगिएको थियो तर गएराति उपचारकै क्रममा उनको मृत्यु भएको प्रहरी नायब उपरीक्षक (डीएसपी) श्रवणकुमार बिक ले जानकारी दिए।
घटनापछि स्थानीयबासीले प्रहरीलाई खबर गरेपछि कुटपिटमा संलग्न खिमबहादुरलाई नियन्त्रणमा लिइएको र घटनाबारे थप अनुसन्धान भइरहेको प्रहरीले जनाएको छ।
स्थानीयहरूका अनुसार मादक पदार्थ सेवनपछि वृद्ध खिमबहादुरले झगडा सुरु गरेका थिए। त्यही क्रममा उनले चिर्पट (काठको दाउरा) प्रहार गर्दा खुसीमान लडेका र टाउकोमा गम्भीर चोट लागेका थिए।
यो घटनाले गाउँमा शोकको वातावरण सिर्जना गरेको छ। प्रहरीका अनुसार वृद्धमाथि ज्यान मार्ने अभिप्रायले हानत लानु भएको आशंकामा ‘हत्यासम्बन्धी कसूर’ अन्तर्गत मुद्दा दर्ता गरिने तयारी भइरहेको छ।
-
Jigyasanepal
