जेरुसेलम – इजरायली सेनाले हिजबुल्लाह समूहले उत्तरी र मध्य इजरायललाई लक्षित गर्दै पठाएका हजारौँ रकेट लन्चरलाई ध्वस्त पारेको जनाएको छ। सेनाको विज्ञप्तिअनुसार, करिब १०० इजरायली वायुसेनाका लडाकू विमानले लेबनानको दक्षिणी सिमानामा रहेका रकेट लन्चर ब्यारेलमा आक्रमण गरेर ती रकेटलाई नष्ट गरेका हुन्।

इजरायली सेनाका प्रवक्ता लेफ्टिनेन्ट कर्णेल नदाव शोशानीले हिजबुल्लाहले उत्तरी इजरायलतर्फ सयौँ रकेट र यूएभी (मानवरहित हवाई वाहन) प्रहार गरेको बताए। उनले भने, "यो आक्रमण हिजबुल्लाहको योजनाबद्ध ठूलो आक्रमणको एक हिस्सा थियो, तर हामीले यसको अधिकांशलाई विफल पार्न सफल भयौँ।"

शोशानीले थपे कि आक्रमणपछि स्थिति मूल्याङ्कन गर्ने क्रम जारी छ, र केही आक्रमणहरू अझै पनि भइरहेका छन्। आक्रमणले सामान्य क्षति पुर्याएको जानकारी पनि उनले दिए।

प्रवक्ता शोशानीका अनुसार, आइतबार भएको आक्रमणमा अमेरिकासहित इजरायलका कुनै पनि साझेदारले भाग नलिएको स्पष्ट गरे। उनले भने, "यो इजरायली सेनाको एकल कारबाही हो।" 

– रासस, एएफपी

• RSS