काठमाडौं - देशभर बाढी र पहिरोका कारण सडक यातायात अवरुद्ध हुँदा अहिले हवाइ यातायातमा यात्रुको चाप उल्लेख्य रूपमा बढेको छ। यसलाई मध्यनजर गर्दै नेपाल नागरिक उड्डयन प्राधिकरणले असोज १७ गतेदेखि ३० गतेसम्म प्रमुख विमानस्थलहरूमा रात्रीकालीन उडानको समय विस्तार गर्ने जानकारी दिएको छ।
प्राधिकरणले जानकारी दिँदै भनेको छ, "देशभर सिर्जित बढ्दो हवाई चापलाई सम्बोधन गर्न घटस्थापनादेखि पूर्णिमासम्म (असोज १७ देखि ३० सम्म) त्रिभुवन अन्तर्राष्ट्रिय विमानस्थल, गौतमबुद्ध अन्तर्राष्ट्रिय विमानस्थल, पोखरा विमानस्थल लगायतका रात्रीकालीन उडान हुने सम्पूर्ण विमानस्थलहरू विहान ४ः३० बजेदेखि राति १२ बजेसम्म सञ्चालनमा आउने व्यवस्था मिलाइएको छ। आवश्यकता अनुसार थप उडानको समय पनि व्यवस्था गरिनेछ।"
यो व्यवस्थाले विशेष गरी दसैंको समयमा यात्रुको चाप व्यवस्थापन गर्न मद्दत पुग्ने प्राधिकरणले बताएको छ।
- Jigyasa media
