काठमाडौं, असोज १४— लगातारको अविरल वर्षाका कारण आएको बाढी र पहिरोले देशभर जनजीवन तहसनहस बनाएको छ। हालसम्म मृत्यु हुनेको संख्या १८८ पुगेको छ भने ४१ जना अझै बेपत्ता रहेको गृह मन्त्रालयले जनाएको छ।

सबैभन्दा ठूलो क्षति काठमाडौंको नागढुंगानजिकै झाप्ले खोलामा भएको हो, जहाँ पहिरोले पुरिएका गाडीहरूमा ३५ यात्रुको ज्यान गएको छ।

गृह मन्त्रालयको पछिल्लो तथ्यांक अनुसार, काठमाडौं उपत्यकामा मात्रै ७९ जनाको ज्यान गएको छ। बागमती प्रदेशका अन्य जिल्लाहरूमा ८५, कोशीमा २१, र मधेशमा ३ जनाको मृत्यु भएको छ। बेपत्ता हुनेहरूमा उपत्यकाका २० जना, बागमतीका ११, कोशीका ७, लुम्बिनीका २, र मधेशका १ जना रहेका छन्।

घाइते ४५ जनाको विभिन्न अस्पतालहरूमा उपचार भइरहेको छ भने ३६५४ जनालाई सकुशल उद्धार गरिएको छ। बाढी र पहिरोका कारण १३२७ घरमा क्षति पुगेको छ भने १९ मुख्य सडकहरू पूर्णरूपमा भत्किएका छन्, जसले यातायातलाई पूर्ण रूपमा अवरुद्ध बनाएको छ।

सरकारले उद्धार कार्यलाई तीव्रता दिँदै जनताको सुरक्षामा भरपुर ध्यानदिएको छ।

• RSS