काभ्रे, मंसिर १६ – काभ्रे जिल्लामा घुँडाभन्दा मुनि खुट्टा गुमाएका अपांगता भएका जेष्ठ नागरिक, युवा, र बालबालिकालाई लक्षित गर्दै विशेष स्वास्थ्य शिविर सम्पन्न भएको छ। बाल अपांग टेवा संस्था र काठमाण्डौ विश्वविद्यालय (केयु) को मेकानिकल विभाग अन्तर्गत डिजाईन ल्याबको संयुक्त प्रयासमा यो कार्यक्रम आयोजना गरिएको हो।
२६ जनाको स्वास्थ्य परीक्षण
कार्यक्रममा २६ जना खुट्टा गुमाएका व्यक्तिहरुको स्वास्थ्य परीक्षण गरिएको छ। केयु मेकानिकल डिजाईन ल्याबका सदस्य श्रीराम थापाका अनुसार परीक्षणबाट व्यक्तिहरूका लागि कृत्रिम खुट्टा उत्पादन र वितरणको योजना अघि बढाइएको छ। यो प्रक्रिया डिसेम्बर महिनाभित्रै पूरा गरिनेछ।
शिविरमा बाल अपांग टेवा संस्था परियोजना प्रबन्धक आशिष अधिकारी, डिजाईन ल्याब प्रमुख प्रतिष्ठित लाल श्रेष्ठ, विभिन्न पालिकाका प्रमुख र उपप्रमुख, वडा अध्यक्षहरू, र सहजकर्ता मनिराज गौतम तथा गोकुल गुरागाईंको सक्रिय उपस्थिति रहेको थियो।
कृत्रिम खुट्टाको डिजिटल उत्पादन
कार्यक्रमको मुख्य उद्देश्य भनेको अपांगता भएका व्यक्तिहरूलाई समाजमा सक्रिय सहभागिता गराउन डिजिटल प्रोस्थेटिक्स केन्द्र स्थापना गर्नु हो। यस परियोजनामार्फत घुँडाभन्दा मुनि खुट्टा गुमाएका व्यक्तिहरूका लागि कृत्रिम खुट्टाको उत्पादन गरिनेछ। परियोजना पनौती, पाचखाल, नमोबुद्ध, र बेथानचोक क्षेत्रका व्यक्तिहरूलाई लक्षित गरेर सञ्चालन गरिएको छ।
यस परियोजनाले अपांगता भएका व्यक्तिहरूलाई आत्मनिर्भर बनाउने मात्र नभई समाजमा उनीहरूको भूमिका र पहिचानलाई अझ सशक्त बनाउने विश्वास लिइएको छ। डिजाईन ल्याबका प्रमुख प्रतिष्ठित लाल श्रेष्ठका अनुसार, यो परियोजना अपांगता भएका व्यक्तिहरूको जीवनस्तर सुधारमा महत्वपूर्ण साबित हुनेछ।
लाभग्राहीहरुले शिविर आयोजकहरु को प्रसंसा गर्दै यो प्रयासलाई उदाहरणीय कदमका रूपमा व्याख्या गरेका छन्। स्वास्थ्य शिविरले अपांगता भएका व्यक्तिहरूलाई मात्र सहयोग गरेको छैन, यसले समाजमा उनीहरूको सक्रिय सहभागिताका लागि नयाँ सम्भावना खोल्ने काम गरेको छ। यो परियोजना जिल्लाका अन्य क्षेत्रका लागि पनि प्रेरणाको स्रोत बन्न पुग्ने विश्वास लिएको बताइन्छ ।
यस कार्यक्रमले अपांगता आफूहरुलाई आत्मनिर्भरता र जीवनमा नयाँ आशा प्रदान गर्ने दिशामा महत्वपूर्ण योगदान दिएको लाभग्रहीहरुले बताएका छन् ।
- Jigyasa media
