काठमाडौँ: सहकारी संस्था बचत रकम दुरुपयोगसम्बन्धी संसदीय छानबिन विशेष समितिले आज (शुक्रबार) पूर्वउपप्रधान तथा गृहमन्त्री रवि लामिछानेको बयान लिँदै छ। उनलाई गोरखा मिडिया नेटवर्क प्रालिको तत्कालीन प्रबन्ध निर्देशकको हैसियतमा सोधपुछका लागि बोलाइएको हो।
गोरखा मिडिया नेटवर्कमा २ ठुला सहकारी संस्थाको बचत रकम लगानी गरिएको थियो, जसमा लामिछानेका साझेदार रहेका पूर्वडिआइजी छविलाल जोशीलाई पनि समितिले बयानका लागि बोलाएको छ। समितिका सभापति सूर्य थापाका अनुसार, छविलाल जोशीको बयान आज बिहान ११ बजे लिनेछ, र त्यसपछि दिउँसो २ बजे रवि लामिछानेलाई सोधपुछ गरिनेछ।
गोर्खा मिडिया नेटवर्कमा छविलाल, रवि लामिछाने, र हाल फरार रहेका गीतेन्द्रबाबु राई (जिबी) साझेदार थिए। छविलालको बयानपछि लामिछानेको बयान लिने तयारी समितिले यसअघि नै गरेको थियो। जोशीकी आमाको निधन भएकाले समितिले बयानका लागि पर्खिरहेको थियो। लामिछानेको बयान भदौ २ गते नै लिने योजना भए पनि जोशीले आमाको काजकिरिया ६ भदौमा सम्पन्न हुने बताएपछि बयान स्थगित गरिएको थियो।
समितिले १० भदौसम्म सोधपुछको काम सक्ने गरी तयारी गरिरहेको छ।
- Jigyasa media
