मधेस । निर्वाचन आयोगले देशभरका विभिन्न स्थानीय तहका ३४ पदका लागि उपनिर्वाचन गराउने तयारी गरिरहेको छ। यो उपनिर्वाचन मंसिर महिनाको अन्तिम सातामा हुने अपेक्षा गरिएको छ।
आयोगले रिक्त भएका नगरपालिकाका प्रमुख, उपप्रमुख, गाउँपालिकाका अध्यक्ष, उपाध्यक्ष, र वडा अध्यक्षहरूको पदपूर्ति गर्ने योजना बनाएको छ। यसका लागि आयोगले मंसिर अन्तिम साता उपनिर्वाचन गराउन सरकारलाई प्रस्ताव गरेको छ।
मधेस प्रदेशको सप्तरी र रौतहट जिल्लामा ४ वटा वडा अध्यक्षका पद रिक्त रहेको छ। आयोगका अनुसार, सप्तरी जिल्लाको डाक्नेश्वर नगरपालिका-४ का वडा अध्यक्षको पद खाली छ। साथै, रौतहट जिल्लाको इशनाथ नगरपालिका-७, राजपुर नगरपालिका-६, र गढीमाई नगरपालिका-८ मा पनि वडा अध्यक्षको पद रिक्त छन्।
निर्वाचन आयोगले यी रिक्त पदहरूमा उपनिर्वाचन गराएर सम्बन्धित पदहरू पूर्ति गर्ने प्रक्रिया अघि बढाइरहेको छ।
- Jigyasa media
