काभ्रे । साहित्यिक सिर्जनाका ध्वनि र कविता भावनाका लहरले खानीखोला गाउँपालिका आइतबार साँझ गुञ्जायमान भयो। गाउँपालिकाको सभा हलमा आयोजना गरिएको वृहत् साहित्यिक कार्यक्रम तथा खुला कविता प्रतियोगितामा स्थानीय प्रतिभाहरूको आवाज गुञ्जियो, जहाँ कलम र शब्दले समाजलाई चिनाउने प्रयत्न गरियो।

अविरल साहित्य समाजको आयोजनामा र खानीखोला गाउँपालिकाको आर्थिक सहयोगमा सम्पन्न उक्त कार्यक्रमले गाउँको साहित्यिक चेतना र प्रतिभा उजागर गरेको छ। कार्यक्रमको प्रमुख आकर्षण रहे राष्ट्रिय कवि मनु मन्जिल, जसको आतिथ्यमा सिंगो सभाहल साहित्यिक भावनाले भरिएको थियो।

कवि मन्जिलले स्थानीय सरकार र साहित्य समाजको प्रयासको खुलेर प्रशंसा गर्दै भने,

"प्रतियोगितामा सहभागी प्रतिभाहरूको सिर्जनामा गहिरो अर्थ र भविष्य देखिन्छ। अब यी कलमधारीहरूको साथ दिनु हाम्रो कर्तव्य हो।"

प्रतिभाको सम्मान, शब्दको उचाइ

प्रतियोगितामा सहभागी १३ जना स्रष्टामध्ये उत्कृष्ट ठहरिएका तोप बहादुर राणा मगर प्रथम, लोक बहादुर थोकर द्वितीय, मनकुमारी थिङ तृतीय तथा सरिता तिमल्सिना सान्त्वना पुरस्कार विजेता बने।

उनीहरूलाई क्रमशः रु १५,०००, १०,०००, ५,००० र २,००० नगद पुरस्कार तथा मायाको चिनो प्रदान गरिएको थियो।

गाउँपालिकाको प्रतिवद्धता— साहित्यको शिर उच्च बनाउने

कार्यक्रमका विशिष्ट अतिथि गाउँपालिका अध्यक्ष इन्द्र बहादुर थिङ (छिन्ताङ) ले भने,

"हाम्रा युवायुवतीको प्रतिभा गाउँमै छ। हामी तिनलाई राष्ट्रिय स्तरमा पुर्‍याउने दृढ इच्छाशक्ति राख्छौँ।"

कार्यक्रममा उपाध्यक्ष दोर्जेमान जिम्बा, प्रशासकीय प्रमुख जीवनराज अर्याल, सातै वडाका अध्यक्षहरू, शिक्षक, साहित्यप्रेमी, मातृभूमि साहित्य समाजका प्रतिनिधि, सञ्चालिका सृजना थिङ लगायतको उपस्थिति थियो।

अध्यक्षीय मन्तव्यमा अविरल साहित्य समाजका अध्यक्ष टीकाराज थिङले यो कार्यक्रमलाई अब वार्षिक स्वरूप दिने घोषणा गरेका छन्।

यसरी, गाउँको भित्ताबाट उठेको कविता राजधानीका रंगमञ्चसम्म पुग्ने आत्मविश्वाससँगै खानीखोलामा शब्द र भावनाको उत्सव सम्पन्न भयो।

• Jigyasanepal