मुग्लिन: मनकामना केबलकार सेवा आजदेखि पुनः नियमित रूपमा सञ्चालनमा आउने भएको छ। नेपालकै पहिलो केबलकार प्रणालीलाई स्तरोन्नति गरी डिजिटल प्रविधिमा सञ्चालन गर्नका लागि आवश्यक कार्य सम्पन्न भएको छ।

गत असार ३१ गतेदेखि स्तरोन्नति र मुख्य तारको लट्ठा परिवर्तन गर्नका लागि केबलकार सेवा बन्द गरिएको थियो। २६ वर्षदेखि एनालग प्रविधिमा सञ्चालन हुँदै आएको मनकामना केबलकार अब आधुनिक डिजिटल प्रणालीमा रूपान्तरण गरिएको हो। मनकामना दर्शन प्रालिका नायब महाप्रबन्धक उज्ज्वल शेरचनका अनुसार अष्ट्रियाको डोप्पलमेयर कम्पनीका प्राविधिकहरूको सुपरिवेक्षणमा यो कार्य सम्पन्न भएको हो।

मनकामना मन्दिर, जो गोरखाको सहिद लखन गाउँपालिकामा अवस्थित छ, नेपालभरका धार्मिक पर्यटकहरूको प्रमुख गन्तव्य हो। दर्शनार्थीहरूलाई सहजता प्रदान गर्न विसं २०५५ मंसिर ८ गतेदेखि चितवनको इच्छाकामना गाउँपालिका–४ चेरेसस्थित ‘बटम स्टेसन’बाट केबलकार सेवा सञ्चालनमा ल्याइएको थियो।

नयाँ डिजिटल प्रणालीले यात्रुहरूको अनुभव अझ सुरक्षित र सहज बनाउने विश्वास गरिएको छ।

• Jigyasa media