काठमाडौं – यूएईमा सुरु भएको एसीसी यू-१९ एसिया कपको पहिलो खेलमा नेपाल श्रीलंकासँग ५५ रनले पराजित भएको छ। श्रीलंकाले दिएको २३४ रनको लक्ष्य पछ्याउने क्रममा नेपाल ४६.२ ओभरमा १७८ रनमै समेटियो।
नेपालका ओपनर मयन यादवले सर्वाधिक ६२ रन बनाए। तर, अन्य ब्याटरले ठूलो योगदान दिन नसक्दा नेपाल लक्ष्य पछ्याउन असफल रह्यो। श्रीलंकाका बलर प्रवीण मनीशाले ९ ओभरमा ३० रन खर्चेर ३ विकेट लिए। यस्तै, न्यूथन रन्जितकुमार, मथुलान कुगथास, र विहास थ्योमिकाले २–२ विकेट लिए।
यसअघि, टस हारेर ब्याटिङ थालेको श्रीलंकाले ५० ओभरमा सबै विकेट गुमाउँदै २३३ रन बनाएको थियो। श्रीलंकाका सरुजन सनमुगनाथनले ६२ रनको महत्वपूर्ण योगदान दिए। यस्तै, लकविन अभेसिङ्गेले ५० रन र कविजा गमागेले ३७ रन बनाए।
नेपालका बलर सन्तोष यादवले प्रभावशाली प्रदर्शन गर्दै १० ओभरमा ४५ रन खर्चेर ४ विकेट लिए। युवराज खत्रीले २ विकेट लिए भने कप्तान हेमन्त धामी र नरेन साउदले १–१ विकेट हात पारे।
नेपालको प्रदर्शनले बलिङमा केही आशा देखिए पनि ब्याटिङ विभागमा सुधार आवश्यक रहेको देखाएको छ। अबको खेलमा नेपालले आफ्नो प्रदर्शन सुधार्ने अपेक्षा गरिएको छ।
- Jigyasa media
