काठमाडौं – नेपाली राष्ट्रिय भलिबल टिमका कप्तान मानबहादुर श्रेष्ठले सन्न्यास घोषणा गरेका छन्। उनले आइतबार सामाजिक सञ्जालमा भिडियो पोस्ट गर्दै यो महत्वपूर्ण निर्णय सार्वजनिक गरेका हुन्। त्रिभुवन आर्मी क्लबबाट घरेलु भलिबल खेल्दै आएका मानबहादुरले आफ्नो करियरलाई नयाँ पुस्ताको लागि मार्ग प्रशस्त गर्ने उद्देश्यले सन्न्यास लिएको बताएका छन्।
श्रेष्ठको नेतृत्वमा रहेको नेपालले सन् २०१७ मा एभिसी सिनियर मेन्स सेन्ट्रल जोन भलिबलमा कांस्य पदक जितेको थियो। साथै, उनले नेपालका लागि दुई पटक एसियाड खेल्दै महत्वपूर्ण योगदान दिएका छन्। गत वर्ष चीनमा भएको १९औं एसियाडमा उनले नेपाली टिमको कप्तानी गरेका थिए।
उनले भिडियोमा भनेका छन्, "राष्ट्रिय टिमबाट अवकाश लिने निर्णय लिन सजिलो थिएन, तर अब युवा खेलाडीहरूको लागि ठाउँ दिनु आवश्यक ठानेँ।" २७ वर्षीय श्रेष्ठले नेपालको बीच भलिबलमा पनि उत्कृष्ट प्रदर्शन गर्दै दुई पटक रजत पदक जिताएका थिए।
अब नयाँ पुस्ताका लागि मार्ग खुला गर्दै, भलिबलप्रेमीहरूको मन जित्दै आएका श्रेष्ठले सन्न्याससँगै नेपाली खेल क्षेत्रमा आफ्नो नयाँ अध्यायको सुरुवात गर्नेछन्।
- Jigyasa media
