काठमाडौं, पुस २० – काठमाडौंको गौशालास्थित बागमती होटलमा मृत भेटिएकी सुस्मिता खड्काको हत्या काण्डमा मुख्य अभियुक्त पनि मृत अवस्थामा फेला परेका छन्। फरार रहेका देवबहादुर थापा ओखलढुंगाको जंगलमा झुन्डिएको अवस्थामा भेटिएका हुन्।
ओखलढुंगाका प्रहरी निरीक्षक विजय कार्कीका अनुसार थापा सुनकोशीको सिस्नेरी क्षेत्रमा मृत फेला परेका हुन्। 'घटनास्थलमा पुगेर अनुसन्धान सुरु गरिएको छ,' कार्कीले जानकारी दिए।
यसअघि, पुस १७ गते सुस्मिता खड्का होटलको ३०८ नम्बर कोठामा मृत भेटिएकी थिइन्। प्रारम्भिक अनुसन्धानले थापाले खड्काको हत्या गरी कोठामा ताल्चा लगाएर फरार भएको देखाएको थियो। थापा खड्कासँगै होटलमा बसेको खुलेपछि उनको खोजी भइरहेको थियो।अहिलेसम्म घटनाबारे थप अनुसन्धान जारी रहेको प्रहरीले जनाएको छ।
- Jigyasa media
