सङ्खुवासभा ।
सङ्खुवासभाको मकालु गाउँपालिका–३ मा बुधबार बिहान भएको ट्याक्टर दुर्घटनामा दुईजनाको मृत्यु भएको छ। दुर्घटनामा परेर खाँदबारी नगरपालिका–८ बिष्णेधाराका १९ वर्षीय चालक किरण श्रेष्ठ र १७ वर्षीय सहचालक उदित श्रेष्ठको घटनास्थलमै ज्यान गएको जिल्ला प्रहरी कार्यालयका सूचना अधिकारी प्रहरी निरीक्षक रामकुमार लामिछानेले जानकारी दिएका छन्।
प्रदेश नं. १–०२–००३ त १४३७ नम्बरको ट्याक्टर बरुण दोभानबाट खाँदबारीतर्फ जाँदै गर्दा समटार भन्ने स्थानमा भीरबाट करिब ३०० मिटर तल खसेको थियो। ट्याक्टर खाली थियो र तीव्र मोडको कारण दुर्घटना भएको हुनसक्ने अनुमान गरिएको छ।
प्रहरीले मृतकको शव निकाल्ने कार्य जारी राखेको र पोष्टमार्टमका लागि जिल्ला अस्पताल खाँदबारी पठाइने तयारी भइरहेको छ। घटनाको थप अनुसन्धान भइरहेको प्रहरी निरीक्षक लामिछानेले बताएकाछन्।
- Jigyasa media
