सिन्धुपाल्चोक, भदौ १०, २०८२
अरनिको राजमार्गअन्तर्गत भोटेकोसी गाउँपालिका–४, हिन्दीमा आज दिउँसो बोलेरो गाडी भीषण दुर्घटनामा परेपछि दुई जना बेपत्ता भएका छन्।
दिउँसो करिब साढे ३ बजे तातोपानीबाट बाह्रबिसे आउँदै गरेको बा२१च ७५४४ नम्बरको बोलेरो सडकबाट करिब २० मिटर तल खस्दै भोटेकोसी नदीमा पुगेको जिल्ला प्रहरी कार्यालयका प्रहरी नायब उपरीक्षक (डीएसपी) माधवराज खरेलले जानकारी दिए।
दुर्घटनाग्रस्त बोलेरो सर्लाही बरहथवा नगरपालिका–२ का २३ वर्षीय चालक राजेशकुमार कुसहवाले चलाइरहेका थिए भने सोही गाडीमा रौतहट बौधिमाई नगरपालिका–१ का २५ वर्षीय राम प्रवेश महतो सहचालकका रूपमा सवार थिए।
उद्धारका क्रममा नदीले एक पुरुषको शव बगाएको देखिएको र हालसम्म चालक तथा सहचालक दुवैजनाको अवस्थाबारे पत्ता नलागेको प्रहरीले जनाएको छ। खोजतलासका लागि घटनास्थलमा प्रहरी टोली परिचालन गरी कार्य अगाडि बढाइएको जिल्ला प्रहरी कार्यालय, सिन्धुपाल्चोकले जनाएको छ।
-
Jigyasanepal
