काठमाडौँ, असोज ८, २०८२ बुधबार।

देशका विभिन्न भागमा आज (बुधबार) दिउँसोदेखि मध्यमदेखि भारी वर्षा हुने पूर्वानुमान जल तथा मौसम विज्ञान विभाग, मौसम पूर्वानुमान महाशाखाले गरेको छ।

महाशाखाले आज बिहान सार्वजनिक गरेको प्रक्षेपणअनुसार दिउँसो देशभर साधारणतया बदली रहनेछ। कोसी प्रदेश, मधेस प्रदेश, बागमती प्रदेश र गण्डकी प्रदेशका केही स्थानमा, साथै लुम्बिनी प्रदेशसहित बाँकी पहाडी भूभागका थोरै स्थानमा मध्यम वर्षा हुने सम्भावना देखिएको छ।

त्यस्तै, कोसी, बागमती र गण्डकी प्रदेशका पहाडी भूभागका एक–दुई स्थानमा भारी वर्षा हुने उच्च सम्भावना भएकाले स्थानीयवासीलाई सतर्क रहन आग्रह गरिएको छ ।

आज राति देशका पहाडी भेगमा साधारणतया बदली रहने महाशाखाले जनाएको छ। गण्डकी, लुम्बिनी र कर्णाली प्रदेशका पहाडी भूभागका केही स्थानमा तथा तराईका एक–दुई स्थानमा पनि मध्यम वर्षा हुन सक्ने चेतावनी दिइएको छ।

महाशाखाले वर्षासँगै पहिरो, बाढी र सडक अवरुद्ध हुने जोखिम बढ्न सक्ने भएकाले नदी किनार तथा पहाडी भूभागमा आवश्यक सतर्कता अपनाउन सबैलाई आग्रह गरेको छ।

• Jigyasanepal