नुवाकोट, फागुन १५ — नुवाकोटबाट काठमाडौँतर्फ जाँदै गरेको यात्रुवाहक सुमो बिहीबार साँझ दुर्घटनामा पर्दा आठ जना घाइते भएका छन्। घाइतेमध्ये चार जनाको अवस्था गम्भीर रहेको प्रहरीले जनाएको छ।

दुप्चेश्वर गाउँपालिका–४ जिम्टाङबाट काठमाडौँका लागि छुटेको बा प्र ०३–००१ ज ७७७ नम्बरको सुमो शिवपुरी गाउँपालिका–५ कुखुरे स्थित ओरालोमा ब्रेक फेल भई अनियन्त्रित हुँदा दुर्घटनामा परेको हो।

जिल्ला ट्राफिक प्रहरी कार्यालयका प्रमुख प्रहरी निरीक्षक विनोद ढकालका अनुसार दुर्घटनामा ५० वर्षीय सम्तेन लामा, ४२ वर्षीय नेमा ग्याम्ते लामा, २७ वर्षीया कल्पना तामाङ र ४३ वर्षीया फूलमाया लामा गम्भीर घाइते भएका छन्। उनीहरूको टाउको र छातीमा गम्भीर चोट लागेकाले थप उपचारका लागि काठमाडौँ पठाइएको छ।

अन्य घाइतेहरू—इन्द्रकुमार तामाङ, रप्सागी तामाङ, सुशीला तामाङ र टेकबहादुर विष्ट—को जिल्लास्थित अस्पतालमा उपचार भइरहेको प्रहरीले जनाएको छ।

दुर्घटनापछि सवारी चालक दुप्चेश्वर गाउँपालिका–४ का आइत लामालाई नियन्त्रणमा लिई थप अनुसन्धान अघि बढाइएको छ। प्रारम्भिक अनुसन्धानमा ब्रेक फेलका कारण दुर्घटना भएको देखिएको प्रहरीको भनाइ छ।

ओरालो र घुम्ती बढी रहेको उक्त सडकखण्डमा यसअघि पनि सवारी दुर्घटना दोहोरिँदै आएको स्थानीयले बताएका छन्। प्रहरीले सवारी साधनको प्राविधिक अवस्था जाँच नगरी यात्रु बोकेर ननिस्कन चालक तथा व्यवसायीलाई आग्रह गरेको छ।

• Jigyasanepal