काभ्रे । जेनजी आन्दोलनको क्रममा नक्खु कारागारबाट भागेका एक कैदीले आफ्नै पत्नीको हत्या गरेर पुनः फरार भएका छन्। काभ्रेपलाञ्चोकको पनौती नगरपालिका–१२ गगालका करिब ३६ वर्षीय सन्तबहादुर तामाङले शनिबार आफ्नी ३० वर्षीया श्रीमती मनिषा तामाङलाई हत्या गरेका हुन्।
पनौती–१२ का वडाध्यक्ष जयराम केसीका अनुसार सन्तबहादुर जबर्जस्ती करणी मुद्दामा दोषी ठहर भई नक्खु कारागारमा सजाय काटिरहेका थिए। भदौ २३ र २४ गतेको जेनजी आन्दोलनकै क्रममा जेलबाट भागेर उनी गगालस्थित घर आएका थिए।
घर आएलगत्तै भएको झगडापछि सन्तबहादुरले आफ्नी पत्नीको हत्या गरी फरार भएको वडाध्यक्ष केसीले पुष्टि गरे।
घटनापछि इलाका प्रहरी कार्यालय बनेपाबाट खटिएको टोली घटनास्थल पुगेको छ। थप अनुसन्धान भइरहेको र फरार आरोपीको खोजी कार्यलाई तीव्र पारिएको इलाका प्रहरी कार्यालय बनेपाका प्रहरी नायब उपरीक्षक (dsp) रामेश्वर त्वातीले जानकारी दिएका छन्।
-
Jigyasanepal
