साउन १३, २०८२ | नवलपुर–चितवन सीमाना

जिज्ञासा नेपाल / गैँडाकोट संवाददाता

नवलपरासी (बर्दघाट–सुस्तापूर्व) र चितवनलाई जोड्ने नारायणी नदीमाथिको पुलबाट एकै दिन दुईजनाले हामफालेर बेपत्ता भएका छन्।

एकजना किशोर बिहान र अर्की एक महिला साँझतिर नदीमा हामफालेपछि अहिले दुबैको अवस्था अज्ञात रहेको इलाका प्रहरी कार्यालय गैँडाकोटले जनाएको छ।

प्रहरीका अनुसार बिहान हामफालेका किशोर गैँडाकोट–५ निवासी १५ वर्षीय आदेश श्रेष्ठ हुन् भने साँझ ७:४५ बजेतिर हामफालेकी करिब ४२ वर्षकी महिलाको पहिचान हालसम्म खुल्न सकेको छैन।

इलाका प्रहरी कार्यालय गैँडाकोटकी प्रमुख प्रहरी निरीक्षक कमला नरालका अनुसार नदीको बहाव तीव्र भएकाले उद्धार कार्यमा बाधा भएको छ।

उनले भनिन्, “साँझपख अँध्यारो हुने बेला महिला हामफालेको हुनाले खोजीमा झन कठिनाइ भएको छ। बिहान हामफालेका किशोरको अवस्थाबारे पनि अहिलेसम्म केही पत्ता लाग्न सकेको छैन।”

🔍 स्थानीय सहयोगमा जारी छ खोजी अभियान

घटना पश्चात इलाका प्रहरी टोली, सशस्त्र प्रहरी, जल प्रहरी र स्थानीय बासिन्दाको सहयोगमा नदीमा व्यापक खोजी कार्य सुरु गरिएको छ।

तर, नदीको गहिराइ, पानीको बहाव र दृश्यता कमजोर भएकाले खोजी कार्यमा समय लाग्न सक्ने अनुमान गरिएको छ।

❗ मानसिक स्वास्थ्य, पारिवारिक तनाव वा अन्य कारण?

हालसम्म दुवैले आत्महत्या नै प्रयास गरेको वा अरू कुनै कारणले हामफालेको विषयमा प्रहरीले अनुसन्धान अगाडि बढाएको छ।

किशोर र महिलाको सम्बन्धबारे समेत केही खुलेको छैन। तर, एकै दिन एउटै पुलबाट दुई जनाको बेपत्ताले स्थानीयलाई समेत स्तब्ध बनाएको छ।

📢 जो–कसैले देखे वा फेला पार्न सहयोग गर्न सक्ने अवस्था भएमा इलाका प्रहरी कार्यालय गैँडाकोटमा सिधा सम्पर्क गर्न अनुरोध गरिएको छ।

• Jigyasanepal