काठमाडौं । आज आइतबार देशभर मौसम आंशिकदेखि सामान्य बदली रहने अनुमान गरिएको छ। मौसम पूर्वानुमान महाशाखाका अनुसार लुम्बिनी, कर्णाली, र सुदूरपश्चिम प्रदेशका केही स्थानहरूमा हल्का वर्षा हुने सम्भावना छ। यस्तै, बागमती र गण्डकी प्रदेशका थोरै स्थानमा पनि वर्षा हुने अनुमान गरिएको छ।

देशका उच्च पहाडी तथा हिमाली भूभागका धेरै स्थानमा हल्का हिमपात हुने सम्भावना रहेको छ।

रातिको अवस्थाः

आइतबार राति कोशी, मधेश, र बागमती प्रदेशका पहाडी भूभागमा सामान्य बदली हुने सम्भावना छ। अन्य स्थानमा आंशिक बदलीदेखि सफा मौसम रहनेछ।

बागमती, गण्डकी, र कर्णाली प्रदेशका केही स्थानमा छिटपुट वर्षा हुने सम्भावना छ। कोशी र बागमती प्रदेशका उच्च पहाडी तथा हिमाली भूभागमा हल्का हिमपातको सम्भावना छ भने अन्य हिमाली क्षेत्रका केही स्थानमा पनि हिमपात हुने संकेत छ।

वर्षा र हिमपातका कारण दैनिक जीवनमा प्रभाव पर्न सक्ने भएकाले आवश्यक सतर्कता अपनाउन मौसम महाशाखाले आग्रह गरेको छ।

• Jigyasa media