विराटनगर, बैशाख १६ । संखुवासभाको धर्मदेवी नगरपालिका–८ सुर्तीबारीमा सोमबार दिउँसो एक बोलेरो गाडी अरुण नदीमा खसेर बेपत्ता भएको छ। दुर्घटनामा पैदल यात्रु ठक्कर खाँदा गाडी अनियन्त्रित भएर करिब ४० मिटर तल नदीमा खसेको हो।

प्रदेश १–००२ च ४१०३ नम्बरको बोलेरो संखुवासभाबाट धनकुटातर्फ जाँदै थियो। जिल्ला प्रहरी कार्यालय संखुवासभाका अनुसार बोलेरो चालकसहित दुई जना यात्रुले नदीमा खस्ने क्रममा हाम फालेर ज्यान जोगाएका छन्।

दुर्घटनामा तीन जना घाइते भएका छन्। घाइतेहरूमा खाँदवारी नगरपालिका–९ का ४० वर्षीय रमेश राई, मकालु गाउँपालिका–५ याङ्सीमाका २० वर्षीय किरण गुरुङ, र चैनपुर नगरपालिका–११ का ६६ वर्षीय पैदल यात्री ढोकरबहादुर पाण्डे छन्। घाइतेहरूको तुम्लिङटारस्थित मनकामना अस्पतालमा उपचार भइरहेको छ।

जिल्ला प्रहरीका अनुसार गाडीका मालिक समेत रहेका रमेश राई पनि घाइते भएका हुन्। बोलेरोमा चालक र अर्का एकजना मात्रै सवार थिए।

गाडी हालसम्म नदीमा बेपत्ता रहेको र खोजी कार्य जारी रहेको प्रहरीले जनाएको छ।

• Jigyasanepal