असोज १८, २०८२ | काठमाडौं

धरानबाट पाँचथरतर्फ जाँदै गरेको यात्रुबाहक बलेरो जीप शनिबार बिहान तमोर नदीमा खसेको छ। स्थानीय प्रशासनका अनुसार जीप करिब पाँच सय मिटर तल खसेको अनुमान गरिएको छ।

कोसी प्रदेशका प्रहरी प्रमुख तथा डीआईजी ईश्वर कार्कीले घटनाको पुष्टि गर्दै भने, “धरानबाट पाँचथर जाँदै गरेको बलेरो जीप तमोर नदीमा खसेको जानकारी प्राप्त भएको छ। अहिले प्रहरीको टोली घटनास्थलतर्फ पुग्दै छ र उद्धार कार्य सुरु भएको छ।”

प्रत्यक्षदर्शी सागर ढकालले सामाजिक सञ्जालमार्फत् दुर्घटनाको पुष्टि गर्दै तत्काल उद्धारका लागि अनुरोध गरेका छन्। उनका अनुसार जीप कार्तिके नजिकै सडकबाट अनियन्त्रित भएर नदीमा खसेको हो।

स्थानीयहरू र सुरक्षाकर्मीको संयुक्त टोली उद्धारका लागि खटिएको प्रहरीले जनाएको छ। तर, यात्रुहरूको अवस्थाबारे अहिलेसम्म कुनै स्पष्ट विवरण सार्वजनिक गरिएको छैन।

निरन्तर वर्षा भइरहेका कारण सडकमा फिसलन र दृश्यता कमजोर भएको बताइँदैछ, जसका कारण दुर्घटनाको जोखिम बढेको छ।

यसअघि पनि सो क्षेत्रमा सडक साँघुरो र घुम्तीदार भएकाले नियमित रूपमा दुर्घटनाहरू हुने गरेको स्थानीयहरू बताउँछन्।

सावधानीको सन्देश:

यातायात प्रहरीले हिलो, फिसलन र दृश्यता कम हुने सडकमा अत्यधिक सतर्कता अपनाउन आग्रह गरेको छ।

– रात्री वा निरन्तर वर्षा भएको बेला यात्रा गर्दा गाडीको गति नियन्त्रणमा राख्न,

– जोखिमपूर्ण भागमा पार्किङ नगर्न, र

– चालक र यात्रु दुबैको सुरक्षा प्राथमिकता दिन अनुरोध गरिएको छ।

• Jigyasanepal