झापा — भारतबाट नेपालतर्फ लागु औषध लुकाएर ल्याउँदै गरेका एक युवक झापामा प्रहरीद्वारा रंगेहात पक्राउ परेका छन्। सीमावर्ती क्षेत्र हुँदै प्रतिबन्धित पदार्थ ओसारपसार भइरहेको संवेदनशील समयमा प्रहरीले गरेको तिव्र चेकजाँचका क्रममा शुक्रबार साँझ युवक पक्राउ परेका हुन्।
भद्रपुर नगरपालिका–५ मेचीबिटामा खटिएको प्रहरी टोलीले भारतबाट पैदलै नेपालतर्फ प्रवेश गर्दै गरेका झापाको हल्दिबारी गाउँपालिका–३ बस्ने ३१ वर्षीय अनुप महतोलाई शंका लागेर चेकजाँच गर्दा मलद्वारभित्र प्लास्टिकको पोका हालेर लुकाइ ल्याइएको ब्राउन सुगर जस्तो पदार्थ फेला परेको जिल्ला प्रहरी कार्यालय झापाले जनाएको छ।
प्रहरीका अनुसार उक्त लिसाइलो पदार्थ प्लास्टिकसहित तौल गर्दा १० ग्राम १८० मिलिग्राम र प्लास्टिक हटाउँदा ९ ग्राम रहेको छ। महिनौँदेखि साना–साना मात्रामा प्रतिबन्धित पदार्थ सीमा हुँदै भित्र्याइने गतिविधि बढ्दै गएको पृष्ठभूमिमा यो पक्राउलाई प्रहरीले महत्वपूर्ण उपलब्धि मानेको छ।
महतोलाई पक्राउ गरी लागु औषध नियन्त्रण ऐन अन्तर्गत मुद्दा दर्ता गरी थप अनुसन्धान अघि बढाइएको प्रहरीले जनाएको छ। सीमावर्ती क्षेत्रमा बढ्दो अवैध ओसारपसार नियन्त्रणका लागि थप कडाइ गरिएको पनि प्रहरीले जानकारी दिएको छ।
-
Jigyasanepal
