काठमाडौँ । नेपालमा अहिले पश्चिमी वायुको आंशिक प्रभाव रहेको मौसम पूर्वानुमान महाशाखाले जनाएको छ। यसका कारण देशका विभिन्न भूभागमा हुस्सु, कुहिरो र आंशिक बदलीको अवस्था देखिएको छ।

महाशाखाका अनुसार शनिबार बिहान तराईका धेरै स्थान तथा उपत्यकाहरूमा हुस्सु/कुहिरो लागेको छ भने कोसी प्रदेशसहित देशका हिमाली तथा उच्च पहाडी भूभागमा आकाशमा पातला बादल देखिएका छन्। यसले चिसो बढ्नुका साथै दृश्यता कम गराएको छ।

दिउँसो कस्तो होला मौसम?

दिउँसो तराईका केही स्थानमा हुस्सु/कुहिरो कायमै रहने मौसम महाशाखाले जनाएको छ। कोसी र गण्डकी प्रदेशका हिमाली भूभागमा मौसम साधारणतया बदली रहनेछ भने देशका बाँकी भूभागमा आंशिक बदलीको अवस्था रहने अनुमान छ। यसैबीच, कोसी र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा वा हिमपातको सम्भावना रहेको छ।

राति पनि बदली र हिमपातको सम्भावना

रातिको समयमा तराईका थोरै स्थानमा हुस्सु देखिन सक्नेछ। कोसी, बागमती र गण्डकी प्रदेशका पहाडी तथा हिमाली भूभागमा मौसम आंशिक बदली रहनेछ भने अन्य भूभागको मौसम मुख्यतया सफा रहने प्रक्षेपण गरिएको छ। यस्तै, कोसी र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा वा हिमपातको सम्भावना कायमै छ।

मौसम महाशाखाले चिसो, हुस्सु र सम्भावित हल्का वर्षा तथा हिमपातलाई ध्यानमा राख्दै आवश्यक सतर्कता अपनाउन सर्वसाधारण, यात्रु तथा कृषकलाई आग्रह गरेको छ।

• Jigyasanepal