काठमाडौं – देशभर मौसम बदली भएको छ। पश्चिमी वायु र न्यून चापीय प्रणालीको प्रभावका कारण अधिकांश भागमा बादल लागेका छन् भने मधेशबाहेकका प्रदेशमा वर्षा र हिमपातको सम्भावना रहेको छ।
मौसम पूर्वानुमान महाशाखाका अनुसार कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशमा हल्का वर्षा र उच्च पहाडी तथा हिमाली भागमा हिमपात हुन सक्ने देखिएको छ। तर, मधेश प्रदेशमा भने मौसम आंशिक बदली भए पनि वर्षाको सम्भावना छैन।
बर्षा र हिमपातको सम्भावित क्षेत्र
सुदूरपश्चिम, कर्णाली, लुम्बिनी र गण्डकीका केही स्थानमा मेघगर्जन र चट्याङसहित हल्का वर्षा हुनसक्ने अनुमान गरिएको छ।
गण्डकी, कर्णाली र सुदूरपश्चिमका उच्च पहाडी तथा हिमाली क्षेत्रमा हल्का हिमपातको सम्भावना छ।
राति पनि सुदूरपश्चिम र कर्णाली प्रदेशमा बदली रहने सम्भावना छ, जबकि बाँकी भेगमा मौसम खुल्नेछ।
सावधानी अपनाउन सुझाव
मौसम पूर्वानुमान महाशाखाले वर्षा र हिमपातका कारण जनजीवन, स्वास्थ्य, सडक तथा हवाई उडानमा असर पर्न सक्ने भन्दै सतर्कता अपनाउन अनुरोध गरेको छ। विशेष गरी हिमपात हुने क्षेत्रमा चिसो बढ्ने भएकाले यात्रु तथा सर्वसाधारणलाई सावधानी अपनाउन आग्रह गरिएको छ।
प्रदेशअनुसार पूर्वानुमान:
कोशी, बागमती, गण्डकी: उच्च पहाडी क्षेत्रमा हिमपात, पहाडी क्षेत्रमा हल्का वर्षा।
लुम्बिनी, कर्णाली, सुदूरपश्चिम: पहाडी क्षेत्रमा हल्का वर्षा, हिमाली क्षेत्रमा हिमपात।
मधेश प्रदेश: आंशिक बदली भए पनि मौसम मुख्यतः सफा।
मौसम परिवर्तनका कारण चिसो बढ्ने भएकाले आवश्यक सतर्कता अपनाउन स्वास्थ्य विज्ञहरूले सुझाव दिएका छन्।
- Jigyasa media
